کراچی(این این آئی)نئے سال کے پہلے مہینے کے دوران ملک میں پیٹرولیم مصنوعات کی فروخت میں 20 فیصد اضافہ ریکارڈ کیا گیا ہے۔سرکاری اعداد و شمار کے مطابق جنوری2021 میں ملک میں 15 لاکھ میٹر ٹن پیٹرولیم مصنوعات فروخت ہوئی تھیں جب کہ رواں برس

اسی مہینے میں 18 لاکھ میٹرک ٹن پیٹرولیم مصنوعات فروخت ہوئی ہیں ، اس طرح گزشتہ مالی سال کے مقابلے میں رواں سال جنوری میں پیٹرولیم مصنوعات کی فروخت میں 19 فیصد اضافہ دیکھا گیا۔اعداد و شمار کے مطابق رواں مالی سال دسمبر میں کے مقابلے میں جنوری میں پیٹرولیم مصنوعات کی فروخت میں 20 فیصد اضافہ ریکارڈ کیا گیا۔رواں مالی سال کے ابتدائی 7 ماہ کا جائزہ لیا جائے تو اس دوران ایک کروڑ 29 لاکھ میٹرک ٹن سے زائد پیٹرولیم مصنوعات فروخت ہوئیں جب کہ گزشتہ برس اسی دورانیئے میں ایک کروڑ 12 لاکھ میٹرک ٹن سے زائد پیٹرولیم مصنوعات فروخت ہوئی تھیں۔جنوری 2021 کے دوران ملک بھر میں 7 لاکھ 40 ہزار ٹن ہائی اسپیڈ ڈیزل، پیٹرول 7 لاکھ 45 ہزار ٹن اور 12 ہزار ٹن ہائی آکٹین بلینڈنگ کمپونینٹ (ایچ او بی سی)فروخت ہوا۔ملک کی واحد سرکاری آئل کمپنی پی ایس او کی پیٹرولیم مصنوعات کی فروخت میں اجارہ داری قائم ہے۔اعداد و شمار کے مطابق جنوری 2022 کے دوران پاکستان میں

بکنے والی پیٹرولیم مصنوعات کی فروخت میں پی ایس او کا حصہ 48 فیصد ہے۔ جس کے بعد ٹوٹل پارکو 11 فیصد، گیس اینڈ آئل کمپنی پاکستان(گو)10، شیل اور اٹک پیٹرولیم کا 9،9 فیصد جبکہ بائیکو کا حصہ 2 فیصد ہے۔تجزیہ کاروں کے مطابق ملک میں پیٹرولیم مصنوعات کی فروخت میں اضافہ ملک میں مثبت اقتصادی عوامل اور زراعت کے شعبے میں نمایاں ترقی کی وجہ سے ہوا ہے۔