لاہور(این این آئی)پنجاب کی جیلوں میں قیدیوں کے مختلف بیماریوں میں مبتلا ہونے کا انکشاف ہوا ہے۔پنجاب کی جیلوں میں قید یوں کو دی جانے والی صحت کی سہولتوں کا فقدان ہے جس کے باعث قیدی مختلف بیماریوں میں مبتلا ہوگئے

ہیں۔پنجاب کی جیلوں میں ایڈز سے متاثرہ مریضوں کی تعداد294 ہے اور پنجاب کی جیلوں میں اس وقت ہیپا ٹائٹس بی کے 137، شوگر کے 460 جبکہ ذہنی امراض میں مبتلا 59 قیدی موجو د ہیں۔دستاویزات کے مطابق راولپنڈی ریجن کی جیلوں میں 80 ، راولپنڈی 62 ، لاہور ریجن 44 ، گوجرانوالہ 28 ، فیصل آباد 28 ، ساہیوال 20 ، سرگودھا 15 ، ملتان 7 جب کہ 6 ڈیرہ غازی خان ریجن میں 4 قیدی ایڈز میں مبتلا ہیں۔اس وقت ہیپاٹائٹس کے مریضوں کی بڑی تعداد سینٹرل جیل گوجرانوالہ میں ہے جن کی تعداد 112 ہے، ان میں سے 76 قیدی انڈر ٹرائل ہیں۔لاہور ریجن کی جیلوں میں 44، ساہیوال کی جیل میں 22 قیدی موجود ہیں، صرف راولپنڈی کی اڈیالہ جیل میں یہ تعداد 62 ہے۔گوجرانوالہ کی سینٹرل جیل میں یہ تعداد 26 ہے، مختلف جیلوں میں ہیپا ٹائٹس سی کے 517 قیدی ہیں۔دستاویزات کے مطابق ذہنی امراض میں مبتلا 59 قیدیوں میں سے 12 کو پنجاب انسٹی ٹیوٹ آف مینٹل ہیلتھ میں داخل کرادیا گیا ہے۔