لاہور (این این آئی)کپتان لاہور قلندرز شاہین شاہ آفریدی نے 3 ہفتوں کے آرام کے بعد قلندرز ہائی پرفارمنس سینٹر میں ٹریننگ شروع کردی ہے۔اس موقع پر شاہین آفریدی نے بتایا کہ پی ایس ایل کا فائدہ ہو گا، میرا بولنگ کیساتھ بیٹنگ پر بھی فوکس ہے۔انہوں نے بتایا کہ قلندرز ہائی پرفارمنس سینٹر

میں شاندار سہولتیں ہیں، نوجوانوں کو فائدہ ہو رہا ہے۔شاہین آفریدی نے کہاکہ آئی سی سی پلیئر آف دی ایئر کے لیے نامزدگی اعزاز کی بات ہے، میرا خیال تھا کہ ٹیسٹ کے لیے بھی میرا نام آئے گا۔فاسٹ بولر کاکہنا تھا کہ مزید محنت کروں گا، ایوارڈ کے لیے نام آنا بھی ایک اچیومنٹ ہے،محمد رضوان اور بابرا عظم کے نامزد ہونے سے بھی بہت خوشی ہوئی۔کپتان لاہور قلندرز نے کہاکہ محمد رضوان اور بابر اعظم نے سال عمدہ پر فارمنسز دیں، خواہش ہے کہ رضوان کو آئی سی سی ایوارڈ ملے۔ انہوں نے کہا کہ ایوارڈ ملنا یا نہ ملنا میرے ہاتھ میں نہیں میرے ہاتھ میں پرفارمنس تھی جو دی، میں سمجھتا ہوں کہ یہ ایک اچیومنٹ ہے۔ شاہین آفریدی نے کہا کہ میں سمجھتا ہوں کہ پلیئر آف دی ایئر میں محمد رضوان کو ایوارڈ ملنا چاہیے، مجھے اور زیادہ خوشی ہو گی کہ اگر انہیں یہ ایوارڈ ملتا ہے کیونکہ انہوں نے سال بھر بہت شاندار پرفارم کیا ہے۔