لاہور (نیوز ڈیسک) برطانوی ٹینس سٹار اینڈی مرے نے اعلان کیا ہے کہ وہ اور ان کی اہلیہ کم سیئرز عنقریب والدین بننے والے ہیں۔ اس خبرسے جہاں اینڈی مرے کے آبائی وطن سکاٹ لینڈ کی عوام مسرور ہے، وہیں اکثریت حیران بھی ہے کیونکہ اس جوڑے کی شادی کو ابھی صرف چار ماہ ہی ہوئے ہیں اور توقع کی جارہی تھی کہ جوڑا بھی روایتی جوڑوں کی طرح کم از کم ایک سال بعد ہی خاندان بنانے کی تیاری شروع کرے گا۔ امکان ہے کہ جوڑا آئندہ برس فروری میں ننھے مہمان کا استقبال کرے گا۔ دلچسپ امر یہ ہے کہ جوڑے کو صرف چند دن قبل ہی سابق ومبلڈن چیمپئن آندرے آگاسی نے مشورہ دیا تھا کہ وہ خاندان شروع کرنے پر غور کرے کیونکہ اس طرح اینڈی مرے کی کورٹ میں پرفارمنس بہتر ہوگی۔ مرے کے باپ بننے سے صرف کچھ ہفتے قبل ہی ان کی کوچ اور سابق ٹینس پلیئر امیلی موریسمو بھی ماں بنیں گی۔اینڈی مرے اس خوشخبری پر بے حد پرجوش ہیں تاہم وہ اپنی پروفیشنل ذمہ داریاں نہیں بھولے ہیں اور ان دنوں مونٹریال میں ماسٹرز ٹورنامنٹ کی تیاریوں میں مصروف ہیں۔ اس کے بعد وہ سنسناٹی ماسٹرز میں کھیلیں گے۔ اینڈی مرے کے مطابق وہ ان دو ٹورنامنٹس میں بہترین پرفارمنس کے ذریعے31 اگست سے شروع ہونے والے یو ایس اوپن کیلئے اپنی تیاریاں مکمل کرلیں گے