اسلام آباد(نیوز ڈیسک)بھارتی میڈیا کے مطابق امریکہ نے پاکستان پر زور دیا ہے کہ وہ حقانی نیٹ ورک اور لشکر طیبہ کے خلاف بھرپور کارروائی کرے، جس طرح پاکستان عسکریت پسند گروہ تحریک طالبان کے خلاف کارروائی کر رہا ہے، اسی انداز کی سخت کارروائی حقانی نیٹ ورک اور لشکر طیبہ کے خلاف بھی پاکستان کو کرنی چاہیے۔ بھارتی اخبار ٹائمز آف انڈیا کے مطابق افغانستان اور پاکستان کے لئے امریکا کے خصوصی نمائندے ڈین فیلڈمین نے کہا کہ جس طرح پاکستان نے بھرپور طریقے سے پاکستانی طالبان کا پیچھا کیا، اسی طرح حقانی نیٹ ورک کے خلاف بھی ایکشن لیا جائے۔ حقانی نیٹ ورک سے امریکی اور افغان زندگیوں اور وسائل کو شدید خطرات لاحق ہے اور لشکر طیبہ جو ممکنہ طور پر خطے کو غیر مستحکم کرسکتی ہے، اس کے خلاف بھی اقدامات کرے۔ افغان پاک خطے کا آخری دورہ کرنے بعد فیلڈ مین نے کہا کہ امریکا اور بھارت کو ان 2تنظیموں سے خطرات لاحق ہیں۔ انہوں نے کہا کہ پاکستان کے نقطہ نظر میں حقانی نیٹ ورک اور لشکر طیبہ کے متعلق زیادہ تبدیلی نہیں آئی۔ فیلڈمین واشنگٹن میں یو ایس انسٹیوٹ آف پیس سے خطاب کر رہے تھے۔ گزشتہ ایک سال سے اوباما کی طرف سے افغانستان اور پاکستان کے لئے خصوصی نمائندے کے طور پر فرائض انجام دینے والے فیلڈمین ایک نجی سیکٹر میں فرائض دینے کے لئے یہ عہدہ چھوڑ رہے ہیں۔