لاہور( این این آئی)پنجاب میں حکمران جماعت نے مضبوط بلدیاتی امیدواروں کی تلاش کے لئے کمیٹی قائم کردی ۔وزیر اعلیٰ پنجاب سردارعثمان بزدار کی جانب سے کمیٹی کے سربراہ وزیر بلدیات میاں محمود الرشید ہوں گے۔ کمیٹی میں ہر ضلع کا متعلقہ وزیر، رکن قومی و صوبائی شامل ہوںگے جبکہ تنظیمی عہدیدار بھی کمیٹی کاحصہ ہوں گے ۔ کمیٹی ہر ضلع کا دورہ کر کے
تحریک انصاف کے مضبوط امیدواروں کی سفارشات مرتب کرے گی۔بتایا گیا ہے کہ گزشتہ بلدیاتی انتخابات کے نتائج، جوڑ توڑ اور مضبوط شخصیات کو پارٹی میں لانے کے لئے بھی سفارشات پیش کی جائیں گی۔ کمیٹی ایک ماہ میں اپنی رپورٹ وزیراعلی سردار عثمان بزدار کو پیش کرے گی۔ وزیر اعلی عثمان بزدار تمام رپورٹ بارے وزیراعظم عمران خان کو بریفنگ دیں گے۔
