لاہور(این این آئی) حلقہ این اے 133کے ضمنی انتخاب میں مسلم لیگ (ن) کی کامیابی سے زیادہ پیپلز پارٹی کے امیدوار اسلم گل کی جانب سے غیر متوقع طور پر 32313ووٹ حاصل کرناموضوع بحث بنا ہوا ہے،جبکہ سیاسی حلقوں میں یہ قیاس آرائیاں بھی جاری ہیں کہ مسلم لیگ(ن) کی کامیابی کامارجن کم کرنے کیلئے تحریک انصاف کی جانب سے مبینہ طور پر پیپلز پارٹی کے امیدوارکو

ووٹ ڈلوائے گئے۔تفصیلات کے مطابق حلقہ این اے133کے ضمنی انتخاب کے نتائج سیاسی حلقوں میں موضوع بحث ہیں اورسیاسی تجزیہ نگار اپنے اپنے زاویے سے اس پر اظہار خیال کررہے ہیں۔ ویسے تو ضمنی انتخاب میں مسلم لیگ (ن) کی شائستہ پرویز ملک واضح برتری سے کامیاب ہو گئی ہیں تاہم اس سے زیادہ پیپلزپارٹی کے امیدواراسلم گل کی جانب سے 32313ووٹ حاصل کرنا موضوع بحث ہے۔کچھ سیاسی تجزیہ نگاروں کا کہنا ہے کہ جوووٹ ٹوٹ کر تحریک انصاف کی طرف گیا تھا تحریک انصاف کے میدان میں نہ ہونے کی وجہ سے وہ ووٹ واپس آیا ہے۔یہ بھی کہا جارہاکہ پیپلز پارٹی کی مرکزی قیادت نے کئی دنوں سے اس حلقے پر فوکس کیا ہواتھااورضمنی انتخاب میں اخراجات بھی کئے گئے ہیں جس کے نتائج سامنے آئے ہیں۔سیاسی حلقوں میں یہ قیاس آرائیاں بھی زوروں پر ہیں کہ تحریک انصاف مقابلے سے باہر ہونے کے باوجود ضمنی انتخاب سے لا تعلق نہیں رہی بلکہ اس نے مبینہ طور پر مسلم لیگ(ن) کا کامیابی کا مارجن کم کرنے کیلئے غیراعلانیہ طور پر پیپلزپارٹی کے امیدوارکوووٹ ڈلوائے ہیں۔