اسلام آباد ( آ ن لائن )سینئر قانون دان اور پاکستان پیپلز پارٹی اعتزاز احسن کا کہنا ہے کہ ن لیگ سابق چیف جسٹس کی جو آڈیو لائی ہے اس میں الفاظ کو جوڑا گیا ہے ۔ نجی ٹی وی سے گفتگو کرتے ہوئے انہوں نے کہا ثاقب نثارکی مبینہ آڈیو لیک میں وہی الفاظ ہیں جوانہوں نے ایک جگہ پرتقریرکی تھی۔

جب ثاقب نثار تقریر کر رہے تھے تو سامنے لوگ بھی بیٹھے تھے، ان کی وہی تقریر وہی لہجہ اب آڈیو ٹیپ کی صورت میں لایا گیا ہے۔ میں اتنا تجربہ کار نہیں کہ اس ویڈیو کے غلط یا درست ہونے کے بارے میں بتاؤں۔انہوں نے کہا مبینہ آڈیو لیک کی فرانزک ہونی چاہئیے۔انہوں نے مزید کہا کہ نوازشریف کو کانفرنس میں تقریر نہیں کرنی چاہئیے تھی۔پیپلز پارٹی اوور سیز پاکستانیوں کو ووٹ کا حق دینے کی حمایت کرتی ہے۔ جبکہ سابق چیف جسٹس ثاقب نثار کی مبینہ آڈیو سامنے آنے پر رد عمل دیتے ہوئے بیرسٹر علی ظفر نے آڈیو کلپ کی ٹائمنگ کو اہم قرار دے دیا۔ نجی ٹی وی سے گفتگو ت کرتے ہوئے بیرسٹر علی ظفر نے کہا کہ سماعت شروع ہوتے ہی اس طرح کی خبریں آنا شروع ہوجاتی ہیں۔ ایسا لگتا ہے کہ عدالت میں کیسز پر اثر انداز ہونے کی کوشش کی جارہی ہے۔ سابق وزیر قانون بیرسٹر علی ظفر کہا کہ سابق چیف جسٹس کی مبینہ جعلی آڈیو کی ٹائمنگ اہم ہے۔ سابق چیف جسٹس کی جعلی آڈیو بنانے والوں کو سزا ملنی چاہئیے۔ انہوں نے مطالبہ کیا کہ اس حوالے سے اب تحقیقات ہونی چاہئیں کہ جعلی آڈیو کس نے بنائی؟