اسلام آباد (این این آئی)وزیر مملکت برائے اطلاعات ونشریات فرخ حبیب نے کہا ہے کہ فضل الرحمان کا پاکستانی پارلیمانی سیاست میں کوئی کردار نہیں، پارلیمنٹ کے بارے میں وہ ہی بات کرنے کے مجاز ہیں جو پارلیمنٹ کا حصہ ہیں، پی ڈی ایم ان کا ناکام ترین پروگرام ہے، تاریخوں پر تاریخیں انکا وطیرہ بن چکا ہے، فضل الرحمان 3 سال سے سیاسی بے روزگار ہیں،

اپنے روزگار کے لئے جمہوری حکومت کے خلاف سازشوں میں مصروف ہیں،جس کا اپنا دامن اور ماضی داغ دار ہو وہ صادق و امین قرار پانے والے وزیراعظم عمران خان کے خلاف کس منہ سے بات کرتے ہیں۔ ہفتہ کو مولانا فضل الرحمان کے بیان پر اپنے ردعمل میں وزیر مملکت فرخ حبیب نے کہا کہ عمران خان واحد شخص ہیں جنھیں عالمی سطح کے ساتھ ساتھ پاکستان کے اندر بھی پذیرائی حاصل ہے، دنیا بھر میں ریکارڈ مہنگائی ہوئی ہے بعض شر پسند عناصر پاکستان کی مہنگائی کی آڑ میں اپنی سیاسی دکان چمکارہے ہیں۔ انہوں نے کہا کہ موجودہ حکومت نے ماضی کے قرضوں کی اقساط اور قرضوں پر سود کی ادائیگی کے لئے مجبور ہوکر قرض لئے، فضل الرحمان ن لیگ اور پیپلز پارٹی کی کرپشن میں حصہ دار رہے، فضل الرحمان حقائق بیان کرنے سے عاری ہیں، 2018 کے الیکشن میں شکست کے بعد انکی دماغی پوزیشن ٹھیک نہیں رہی۔ انہوں نے کہا کہ پاکستان تحریک انصاف کو 2018 کے الیکشن میں ریکارڈ ووٹ ملے، 2023 کے الیکشن میں کاکردگی کی بنیاد پر اس سے ڈبل ووٹ لیں گے۔ وزیر مملکت فرخ حبیب نے کہا کہ ن لیگ حکومت میں الیکشن کے فارم سے ختم نبوت کا خانہ ختم کرنے کی تائید اور حمایت کرنے والے فضل الرحمان ہیں۔وزیراعظم عمران خان نے ناموس رسالت کے تحفظ کے لئے ہر فورم پر آواز بلند کی، 22 کروڑ عوام اسلام کی آڑ میں ذاتی مفادات کی سیاست کرنے والوں سے چھٹکارا چاہتے ہیں۔