اسلام آباد(آن لائن )حکومت کومشترکہ اجلاس کے بعد سینیٹ میں کامیابی مل گئی اور اقلیت کے باوجود تین بلز ایوان سے منظور کرانے میں کامیاب ہوگئی جن میں ہائر ایجوکیشن کمیشن بل، صحافیوں کے حقوق کے تحفظ کا بل اور قومی احتساب ترمیمی بل 2021 شامل ہیں۔ چیرمین سینیٹ صادق سنجرانی کی زیر صدارت جمعہ کو سینیٹ اجلاس ہوا ۔
جس میں وفاقی وزیر شیریں مزاری نے ملازمتی مقامات پر خواتین کو ہراساں کئے جانے کے خلاف تحفظ ترمیمی بل 2021، نظام عدل برائے نو عمر افراد ترمیمی بل، قومی کمیشن برائے حقوق تحفظ ترمیمی بل، اسلام آباد دارالخلافہ تحفظ طفل ترمیمی بل ایوان میں پیش کیے۔ چیئرمین سینٹ نے تمام بلز کو متعلقہ کمیٹیوں کے سپرد کردیا۔ چیئرمین سینیٹ کی جانب سے حکومتی بلز کمیٹی کو بھجوانے پر وزیر مملکت علی محمد خان نے شکوہ کرتے ہوئے چیئرمین سینیٹ کو شعر سنا دیا۔ دیکھا جو تیر کھاکے کمین گاہ کی طرف۔ اپنے ہی دوستوں سے ملاقات ہوگئی۔انہوں نے کہا کہ ایسا لگتا ہے ہم نے آپ کو ووٹ ہی نہیں دیا، آج تو لگتا ہے آپ صرف اپوزیشن کے چئیرمین ہیں، حکومت کے تمام بلز کمیٹی کو بھجوائے جارہے ہیں۔ چئیرمین سینیٹ نے کہا کہ میں پورے ایوان کا چئیرمین ہوں، اپوزیشن کا بھی اور حکومتی سائیڈ کا بھی، میرے لئے تمام اراکین قابل احترام ہیں۔ قائد ایوان ڈاکٹر شہزاد وسیم نے کہا کہ اپوزیشن کہتی ہے کہ ہمیں چیئرمین کا احترام ہے، شکر ہے کہ یہ احترام کرتے ہیں لیکن ان کا احترام بھی سلیکٹڈ ہے، جب انکے حق میں فیصلہ ہو تو اسے تسلیم کرتے ہیں، لیکن اکثریت کو بلڈوز کرنا کہتے ہیں۔ ا س کے بعد وزیرمملکت علی محمد خان نے ہائر ایجوکیشن کمیشن سے متعلق ترمیمی بلز ایوان میں پیش کیے جو کثرت رائے سے منظور کرلیے گئے۔
اس کے بعد وفاقی وزیر فروغ نسیم نے سینیٹ میں نیب ترمیمی بل بطور ضمنی ایجنڈا پیش کیا۔ بل کے حق میں 38 اور مخالفت میں 28 ووٹ پڑے۔ سینیٹ نے ایچ ای سی ترمیمی بل بھی منظور کیا۔ بل پیش کرنے کی تحریک کے حق میں 34 اور مخالفت میں 28 ووٹ پڑے۔ حکومت کی جانب سے ایوان میں ضمنی ایجنڈا پیش کیا گیا تو اپوزیشن
نے احتجاج اور شورشرابہ کیا۔اپوزیشن نے چیئرمین سینیٹ کے ڈائس کا گھیراؤ کیا۔ حکومتی ارکان نے ووٹ کو عزت دو اور عمران خان زندہ باد جبکہ اپویشن کی جانب سے ربر اسٹیمپ پارلیمنٹ نا منظور کے نعرے لگائے۔ احتجاج کے دوران سینیٹ کی سیکیورٹی چئیرمین سینیٹ کے ڈائس کے پاس پہنچ گئی۔ چیئرمین سینیٹ صادق
سنجرانی کا کہنا تھا کہ اپوزیشن جب ہاؤس میں اپنے نمبرز پورے نہیں کرسکتی تو کرسی پر انگلی اٹھاتی ہے۔ فروغ نسیم نے سینیٹ اجلاس سے اظہار خیال کرتے ہوئے کہا کہ پاس کیے گئے بل کسی ایک شخص کیلئے نہیں تھے، 2012 سے سینیٹر ہوں، ان کے متعدد بلز کمیٹی میں گئے، بغیر پاس ہوئے۔ سینیٹر فیصل جاوید کا کہنا تھا کہ قوم نے
آج دیکھ لیا ووٹ کی عزت کے نعرے لگانے والے اس کے خلاف کھڑے ہیں، مجلس شوریٰ کے اجلاس میں عوامی مفاد کے حق میں قانون سازی ہوئی، چھوئی موئی اپوزیشن ڈیل اور این آر او چاہتے تھے۔ حکو مت نے ضمنی ایجنڈے پر صحافیوں کے تحفظ کا بل پروٹیکشن آف جرنلسٹس اینڈ میڈیا پروفیشنلز بل 2021 سینیٹ میں پیش کیا تو اپوزیشن نے اس بل کی مخالفت کرتے ہوئےمتعلقہ قائمہ کمیٹی کو بھیجنے کا مطالبہ کیا۔
تاہم چیئرمین نے اس بل پر ووٹنگ کرائی تو ایوان نے کثرت رائے سے صحافیوں کے تحفظ کا بل منظور کرلیا۔ جرنلسٹ پروٹیکشن بل کے حق میں 35 اور مخالفت میں 29 ووٹ آئے۔ وزیر قانون فروغ نسیم نے نیب ترمیمی بل 2021 ایوان میں پیش کیا جو کثرت رائے سے منظور کرلیا گیا۔ اپوزیشن نے ایجنڈا کی کاپیاں پھاڑ کر چیئرمین سینیٹ کی طرف لہرا دیں اور شدید احتجاج کیا۔ چیرمین نے سینیٹ اجلاس غیر معینہ مدت کیلئے ملتوی کردیا۔
