اسلام آباد (آن لائن) گلگت بلتستان کے سابق چیف جسٹس رانا شمیم کے صاحبزادے احمد احسن رانا نے سینیٹر فیصل واؤڈا کے خلاف ہتک عزت دعویٰ دائر کرنے کا اعلان کردیا، 26 نومبر کو ہم دبنگ انداز سے عدالت میں پیش ہو کر

اپنا جواب جمع کرائیں گے۔نجی ٹی وی سے گفتگو کرتے ہوئے رانا شمیم کے صاحبزادے احمد احسن رانا نے کہا کہ والد کے بیان حلفی کے حوالے سے گفتگو کرنے والوں کے خلاف ہتک عزت دعویٰ دائر کرنے کا فیصلہ کیا ہے۔انہوں نے بتایا کہ پہلا ہتک عزت دعویٰ سینیٹر فیصل واؤڈا کے خلاف دائر کیا جائے گا، جس کا نوٹس انہیں پیر یا منگل کے روز مل جائے گا۔والد دو سال پہلے بھی بیان حلفی دے سکتے تھے، اگر وہ ایسا کرتے تو تحریک انصاف اقتدار میں نہیں آسکتی تھی، بیان حلفی سچا ثابت ہوگیا تو آج بھی حکومت چلی جائیگی۔انہوں نے کہا کہ ’راناشمیم اپنے بیان پر قائم ہیں اور وہ اس معاملے کو جہاد کی طرح دیکھ رہے ہیں، میں اپنے والد کا ساتھ دوں گا اور 26 نومبر کو ہم دبنگ انداز سے عدالت میں پیش ہوں کر اپنا جواب جمع کرائیں گے۔لندن میں نوازشریف اور رانا شمیم کی ملاقات کے سوال کا جواب دینے سے گریز کیا اور کہا کہ ملاقات ہونے یا نہ ہونے کی صورت میں بیانِ حلفی پر کوئی فرق نہیں پڑتا۔