کولمبو(نیوزڈیسک) سری لنکا کے خلاف ٹی ٹونٹی سیریز میں جہاں46 کا ہندسہ پاکستانی ٹیم کیلئے خوش قسمتی کی علامت بن گیا ،سیریز میں کامیابی کے ساتھ پاکستانی ٹیم اور کھلاڑیوں نے کئی ایک ایک منفرد ریکارڈ بھی اپنے نام کئے ۔رپورٹ کے مطابق ٹی ٹونٹی سیریز میں 46 کا ہندسہ پاکستانی ٹیم کیلئے خوش قسمتی کی علامت بنا رہا جہاں پہلے میچ میں احمد شہزاد، شعیب ملک اور عمر اکمل نے 46 رنز کی اننگ کھیل کر پاکستان کی فتح میں اہم کردار ادا کیا جبکہ دوسرے میچ کے مرد میدان انور علی نے بھی 17 گیندوں پر چار چھکوں اور تین چوکوں کی مدد سے 46 رنز کی باری کھیل کر میدان مارا۔اس اننگ کے ساتھ ہی انور علی ٹی ٹونٹی کرکٹ میں نویں نمبر پر سب سے زیادہ رنز بنانے والے بلے باز بن گئے ہیں جہاں اس سے قبل اس نمبر پر سب سے زیادہ رنز بناے کا ریکارڈ بھی ایک پاکستانی سہیل تنویر کے پاس تھا جنہوں نے 41 رنز بنائے تھے۔اس میچ میں پاکستانی ٹیم 40 رنز پر پانچ وکٹیں گنوا بیٹھی، یہ پہلا موقع ہے کہ پاکستانی ٹیم نے پچاس یا اس سے کم رنز پر پانچ وکٹیں گنوانے کے بعد کسی ٹی ٹونٹی میچ میں فتح حاصل کی ہو جبکہ پاکستانی واحد ٹیسٹ ٹیم ہے جسے یہ اعزاز حاصل ہے۔ اس سے قبل یہ اعزاز صرف ہانک کانگ کی ٹیم کو حاصل ہے لیکن وہ نیپال کے خلاف صرف 73 رنز کے ہدف کا تعاقب کر رہے تھے جبکہ پاکستانی ٹیم کو 173 رنز کے ہدف کا سامنا تھا۔شاہد آفریدی نے اپنی 45 رنز کی اننگ کے دوران چار چھکے لگائے یہ پہلا موقع تھا کہ آفریدی نے ٹی ٹونٹی کرکٹ میں اپنی کسی اننگ کے دوران چار چھکے لگائے ہوں۔پاکستان نے دورہ سری لنکا میں سات فتوحات اپنی نام کیں جس کے ساتھ ہی یہ اب تک پاکستان کا کامیاب ترین دورہ سری لنکا بن چکا ہے، اس سے قبل قومی ٹیم نے 1994 کے دورے کے دوران چھ فتوحات حاصل کی تھیں۔میچ میں پاکستان نے سنسنی خیز مقابلے کے بعد ایک وکٹ سے فتح حاصل کی، یہ ٹی ٹونٹی کی تاریخ میں محض تیسرا موقع ہے کہ کسی ٹیم نے ایک وکٹ سے فتح اپنے نام کی ہو، اس سے قبل انگلینڈ اور ہالینڈ کی ٹیمیں یہ کارنامہ انجام دے چکی ہیں۔