دبئی ٗ اسلام آباد (این این آئی) پاکستانی بلے باز آصف علی نے پلیئر آف دی میچ ملنے پر لی گئی تصویر شیئر کر دی ۔سماجی رابطے کی ویب سائٹ ٹوئٹر پر آصف علی نے اپنی تصویر شیئر کی جوکہ گزشتہ روز اْنہیں ‘پلیئر آف دی میچ’ ملنے پر لی گئی تھی۔آصف علی نے اپنی تصویر شیئر کرتے ہوئے

ٹوئٹ میں قرآن پاک کی آیت لکھی کہ اور اللّہ تعالیٰ جسے چاہے عزت دے اور جسے چاہے ذلت دے۔قومی کرکٹر نے اپنے ٹوئٹ میں لکھا کہ میری کامیابی صرف اللّہ تعالیٰ کی طرف سے ہے۔دوسری جانب ورلڈکپ میں افغانستان کے خلاف میچ کے ہیرو آصف علی سابق کپتان و ہیڈ کوچ مصباح الحق کے معترف ہوگئے میچ کے بعد پریس کانفرنس میں سابق کپتان مصباح الحق کی تعریف کرتے ہوئے کہا کہ وہ ان کے شکر گزار ہیں کیونکہ کیریئر میں مصباح نے انہیں ہمیشہ سپورٹ کیا۔آصف علی کا ایک پرانا انٹرویو سوشل میڈیا پر وائرل ہورہا ہے جس میں وہ کہہ رہے ہیں کہ مصباح الحق نے انہیں فیصل آباد سے پک کیا۔علاوہ ازیں پاکستانی بلے باز آصف علی کی جانب سے افغانستان سے میچ جتوانے کے بعد جشن کی ویڈیو وائرل ہوگئی ۔ تفصیلات کے مطابق آئی سی سی مینز ٹی ٹوئنٹی ورلڈکپ میں سپر 12 مرحلے میں پاکستان نے آصف علی کے 4 چھکوں کی بدولت افغانستان کو 5 وکٹوں سے شکست دی۔پاکستان کو 12 گیندوں پر 24 رنز درکار تھے کہ آصف علی نے کریم جنت کو 4 چھکے لگا کر میچ ایک اوور پہلے ہی ختم کردیا۔دائیں ہاتھ کے بلے باز نے پاکستان کو جیت دلوانے کے بعد منفرد انداز میں جشن منایا جس کی ویڈیو سوشل میڈیا پر وائرل ہوگئی۔