پشاور (مانیٹرنگ ڈیسک ، این این آئی)چارسدہ میں معمولی تکرار پرفائرنگ سے نوجوان کو قتل کردیا گیا۔پولیس کے مطابق واقعہ چارسدہ کے علاقے پلہ ڈھیری میں پیش آیاجہاں ایک شخص نے معمولی تکرار پر نوجوان کو قتل کیا۔واقعے کے بعد مقتول کے اہلخانہ نے شدید احتجاج کیا اور
ملزم کے گھر کو آگ لگادی جس سے ملزم ہلاک ہوگیا اور اس کی والدہ بھی جھلس گئی۔دوسری جانب وزیر اعلیٰ خیبر پختونخوا محمود خان نے چارسدہ میں ایک نوجوان کے قتل اور مشتعل مظاہرین کی طرف سے قتل کے ملزم کے گھر کو نذر آتش کرنے کے واقعے کا نوٹس لیتے ہوئے انسپکٹر جنرل پولیس سے واقعے کی رپورٹ طلب کرلی ہے۔ وزیر اعلیٰ نے قتل اور اس کے رد عمل میں پر تشدد واقعے کی پر زور مذمت کرتے ہوئے پولیس کو امن و امان اور قانون کی پاسداری کو یقینی بنانے کے لئے ضروری اقدامات کی ہدایت کی ہے۔ انہوں نے کہا کہ دونوں واقعے افسوسناک اور قابل مذمت ہیں جن کی شفاف تحقیقات کی جائیں گی اور کسی کو بھی قانون ہاتھ میں لینے کی اجازت نہیں دی جائے گی۔ وزیر اعلیٰ نے اہل علاقہ سے پرامن رہنے کی اپیل کرتے ہوئے کہا ہے کہ معاملے میں انصاف کے تمام تقاضے پورے کئے جائیںگے۔
