اسلام آباد (مانیٹرنگ ڈیسک /این این آئی)سرائیکی شاعر شاکر شجاع آبادی کوموٹر سائیکل پر اسپتال لے جانے کی ویڈیو سوشل میڈیا پر وائرل ہو گئیں ۔ تفصیلات کے مطابق سرائیکی شاعر شاکر شجاع آبادی کسمپرسی کی زندگی گزارنے پر مجبور ہیں۔شاکر شجاع آبادی کے بیٹے کا والد کو موٹر سائیکل پر
اسپتال لے جانے کے حوالے سے کہنا ہے کہ والد کی حالت خراب ہونے پر حکیم کے پاس لےکر گیا تھا۔انہوں نے بتایا کہ اتنی آمدنی نہیں کہ والد کو ٹیکسی پر اسپتال لے جاتے۔ شاعر کے بیٹے نے شکوہ کرتے ہوئے مزید بتایا کہ حکومتی کاغذات میں ہمیں وظیفہ ملے گا لیکن وہ ابھی تک نہیں ملا ہے ۔دوسری جانب سندھ حکومت نے پنجاب سے تعلق رکھنے والے معروف سرائیکی شاعر شاکر شجاع آبادی کا علاج کروانے کی پیشکش کی ہے. پنجاب کے ضلع ملتان سے تعلق رکھنے والے معروف شاعر شاکر شجاع آبادی کی بیماری و کسمپرسی کا پیپلز پارٹی کے چیئرمین بلاول بھٹو زرداری نے نوٹس لے لیا اور سندھ کے وزیر ثقافت سید سردار علی شاہ کو شاکر شجاع آبادی کا علاج کروانے کی ہدایات کی ہیں -چیئرمین بلاول بھٹو زرداری کی ہدایات پر وزیرِ ثقافت و سیاحت سندھ سید سردار شاہ نے اعلان کیا ہے کہ معروف شاعر شاکر شجاع آبادی کے علاج کے لیے مکمل خرچہ سندھ حکومت کرنے کو تیار ہے.سردار شاہ نے اپنے ٹوئٹ میں کہا کہ جب چیئرمین بلاول صاحب کو شاکر شجاع آبادی کی طبیعت کی ناسازی کا علم ہوا تو انہوں نے کہا کہ شاکر سرائیکی وسیب کی شان اورہمارا سرمایہ ہیں۔ ان کا علاج سندھ حکومت کروائے۔ محکمہ ثقافت سندھ شاکر شجاع آبادی کے علاج یا مالی مدد کے لیئے حاضر ہے ۔
