نئی دہلی (این این آئی)پاکستان کی فتح کے بعد بھارتی میڈیا اور عوام کوہلی الیون پر برس پڑے ۔تفصیلات کے مطابق پاکستان نے ورلڈکپ مقابلوں میں بھارت سے شکست کا جمود توڑ کر اسے چاروں شانے چت کرتے ہوئے 10 وکٹوں سے ہرادیا۔بھارت کا 152 رنز کا دیا گیا ہدف پاکستان

نے بغیر کسی نقصان پر 18ویں اوور میں حاصل کرلیا۔دونوں نے ذمہ دارانہ بیٹنگ کا مظاہرہ کرتے ہوئے اپنی اپنی نصف سنچریاں مکمل کیں۔محمد رضوان نے شاندار بیٹنگ کا مظاہرہ کرتے ہوئے 55 گیندوں پر 6 چوکوں اور 3 چھکوں کی بدولت 79 رنز کی شاندار اننگز کھیلی۔بہترین بولنگ پرفارمنس پر شاہین شاہ آفریدی کو میچ کا بہترین کھلاڑی قرار دیا گیا۔ پاکستان کی شاندار کار کر دگی پر میڈیا بھی اپنے کھلاڑیوں پر برس پڑا جبکہ عوام کی جانب سے بھی سوشل میڈیا پر شدید تنقید کی گئی ۔سابق بھارتی کرکٹر نے بھارت کے ٹی وی چینلز پر میچ کے بعد تبصرہ کرتے ہوئے بھارتی کرکٹرز پر شدید تنقید کی جبکہ اْنہوں نے پاکستانی ٹیم کی تعریف کرتے ہوئے کہا کہ اْن کے کھلاڑیوں کی بولنگ اور بیٹنگ دونوں شاندار رہی۔ اس کے علاوہ سابق کرکٹر ہرپال سنگھ کا کہنا تھا کہ 2017 میں چیمپئنز ٹرافی کے بعد یہ بھارت کی ایک بار پھر بدترین شکست ہے۔بھارت کے ایک اور سابق ٹیسٹ کرکٹر محمد کیف نے بابراعظم اور محمد رضوان کی بیٹنگ کی زبردست تعریف کرتے ہوئے کہا کہ بابراعظم اور رضوان نے جو بیٹنگ کی اْس کی ویڈیو بناکر بار بار بچوں کو دکھانا چاہیے۔واضح رہے کہ پاکستان نے بھارت کو ورلڈ ٹی ٹوئنٹی کے سْپر 12 مرحلے میں یکطرفہ مقابلے کے بعد 10 وکٹوں سے شکست دی۔

موضوعات:ٹی ٹوئنٹی ورلڈ کپ