بیونس آئرس(نیوزڈیسک) ارجنٹینا کے سابق فٹبالر ڈیاگو میراڈونا نے الزام عائد کیا ہے کہ ان کی سابق بیوی کلاڈیا ویلافین نے ان کے بینک اکائونٹ سے تقریباً 90 لاکھ ڈالرز چوری کئے۔ میراڈونا نے ایک لائیو ٹی وی پروگرام کے دوران بتایا کہ ان کی بچپن کی محبت اور سابقہ بیوی چور ہیں۔ انھوں نے کہا کہ اگر کلاڈیا ویلافین نے یہ کیا ہے تو انھیں جیل جانا ہوگا۔ اُدھر کلاڈیا ویلافین اس الزام کو مسترد کر رہی ہیں۔ فٹ بال کے کھلاڑی کی حیثیت سے شہرت حاصل کرنے سے قبل یہ جوڑا ارجنٹینا کے علاقے بیونس آئرس میں ایک دوسرے سے ملا تھا۔ ان کی دونوں بیٹیاں ڈلما اور گیانینا سماجی رابطوں کی ویب سائٹ ٹوئٹر پر اپنی والدہ ویلافین کی حمایت کر رہی ہیں۔ خیال رہے کہ ارجنٹینا نے 1986 کا ورلڈ کپ میراڈونا کے گول کی وجہ سے جیتا تھا۔ فٹ بال شائقین انھیں بہت قدر کی نگاہ سے دیکھتے ہیں