لاہور(این این آئی) وزیراعلیٰ پنجاب سردار عثمان بزدار نے اندرون لاہور کے شہریوں کی سہولت کیلئے میگاپراجیکٹ حضرت علی ہجویری داتا گنج بخش ؒ (شیرانوالہ )فلائی اوور کا باضابطہ سنگ بنیاد رکھ دیا۔اس منصوبے پر تقریبا5ارب روپے لاگت آئے گی۔وزیراعلیٰ عثمان بزدارنے پراجیکٹ کا باضابطہ سنگ بنیاد رکھنے کی تقریب سے خطاب کرتے ہوئے کہاکہ لاہور کی ثقافتی اورتاریخی اہمیت مسلمہ ہے،

لاہورپاکستان کا دل ہے۔اندرون شہر میں تاریخی عمارتیں ہیںجس سے اندرون شہر سیاحوں کیلئے بہت کشش رکھتا ہے ۔شیرانوالہ گیٹ کے قریب مینارپاکستان ،شاہی قلعہ اورحضرت داتا گنج بخشؒ کا مزار ہے ۔اندرون شہر کے لوگوں کے لئے پہلی بار کسی حکومت نے میگا پراجیکٹ شروع کیا ہے ۔اس علاقے میں ماضی میں بھی بہت کام کرنے کی ضرورت تھی۔ وزیراعلیٰ عثمان بزدار نے شیرانوالہ فلائی اوورپراجیکٹ کا نام حضرت علی ہجویری داتا گنج بخش ؒ سے منسوب کرنے کا اعلان کیا ہے اورکہا کہ حضرت داتا گنج بخش ؒ فلائی اوور نئے اورپرانے لاہور کو آپس میں ملائے گا۔لاہور شہر میں ٹریفک کے مسائل کے حل کیلئے حضرت داتا گنج بخش ؒ فلائی اوور کی تعمیر ضروری تھی۔اس منصوبے پر 5ارب روپے لاگت آئے گی۔ اللہ تعالیٰ کے فضل و کرم سے لاہو رمیں چوتھے بڑے پراجیکٹ کا آغاز کیا ہے ۔ لعل شہباز قلندر انڈر پاس مکمل ہو چکا ہے، گلاب دیوی انڈرپاس مقررہ مدت سے پہلے ہی مکمل کر لیا جائیگا۔ شاہکام چوک اوورہیڈ برج کا منصوبہ بھی تیزی سے تکمیل کے مراحل طے کر رہا ہے ۔ حضرت داتا گنج بخش ؒ فلائی اوور کیساتھ نئی سیوریج لائن بچھائی جارہی ہے ۔حضرت داتا گنج بخش ؒ فلائی اوور پراجیکٹ کی شفاف ٹینڈرنگ کر کے 27کروڑ بچائے گئے ہیں ۔ یہ منصوبہ مکمل ہونے سے روزانہ 1لاکھ30ہزار گاڑیوں کو آمدورفت میں آسانی ہوگی۔

انہوں نے کہا کہ ایل ڈی اے نے اس منصوبے کو تیز رفتاری سے آگے بڑھایا ہے اورپراجیکٹ کو مقررہ مدت سے پہلے مکمل کیا جائے گا۔ تجارتی علاقوں میں پارکنگ کا مسئلہ حل کرنے کیلئے شیرانوالہ گیٹ ،مستی گیٹ اورایک موریہ پل کے قریب 3بڑے پارکنگ پلازہ بھی تعمیر کیے جائیںگے۔پارکنگ پلازوں میں مجموعی طورپر ایک ہزار

سے زائد گاڑیاں پارک کر نے کی گنجائش ہوگی۔انہوںنے کہا کہ لاہور میں بارش کے پانی کی نکاسی کیلئے انڈر گراؤنڈ واٹر سٹوریج ٹینک بنائے گئے ہیں ۔لارنس روڈ پر انڈر گراؤنڈ واٹر سٹوریج ٹینک مکمل ہوچکا ہے اور اب اس علاقے میںپانی کھڑا نہیں ہوتا ۔ پنجاب بھر میں انڈر گراؤنڈ واٹر سٹوریج ٹینک بنائے جائیںگے۔کیولری گراؤنڈ

سے ڈیفنس جانے والی سڑک پر ٹریفک بلاک ر ہتی ہے یہاں بھی انڈر پاس بنایا جائے گا۔ پاکستان تحریک انصاف کے تین سالہ دور حکومت میں لاہور میں اربوں روپے کے ترقیاتی منصوبے مکمل کئے گئے ہیں۔ انہوںنے کہا کہ شہر کے داخلی راستے شاہدرہ چوک پر ٹریفک کے بڑھتے ہوئے مسائل حل کرنے کیلئے Turbo

Roundabout بنایا جائے گا۔ ملٹی لیول گول چکر کے ذریعے عام اور بھاری ٹریفک کے گزرنے کیلئے الگ الگ راستے بنائے جائیں گے- لاہور میں راوی ریور اربن ڈویلپمنٹ پراجیکٹ(RUDA) اور سنٹرل بزنس ڈسٹرکٹ (CBD)گیم چینجر منصوبے ہیں – لاہور میں شروع ہونے والے دیگر ترقیاتی منصوبوں سے نہ صرف لاہور شہر

کا حسن دوبالا ہو گا بلکہ ایک عالمی معیار کے Metropolis میں بدل دیا جائے گا-وزیراعلیٰ نے بتایا کہ گنگارام ہسپتال میں7ارب روپے کی لاگت سے مدراینڈ چائلڈ بلاک مکمل ہونے والا ہے۔فیروز پور روڈ پرایک ہزار بیڈ کا نیاجنرل ہسپتال بنایا جا ئے گا۔سروسز ہسپتال ،جناح ہسپتال اورفیروز پور روڈ پر تین نئے ایمرجنسی بلاکس

بنائے جائیں گے ۔یہ ایمرجنسی بلاکس 400بستروں پر مشتمل ہوںگے اوران پر کام اسی برس شروع ہوگا۔انہوںنے کہا کہ شاہی قلعہ میں تاریخی ورثے کی بحالی اورتحفظ کے پراجیکٹ پر4ارب روپے لاگت آئے گی۔والڈ سٹی اتھارٹی آف لاہور کا دائرہ کار پورے پنجاب تک بڑھادیاگیا ہے ۔پنجاب اسمبلی کی نئی عمارت کو ہماری حکومت نے

مکمل کیا ہے ۔انہوں نے کہا کہ بادشاہی مسجد کی بحالی اوراس کی تاریخی اہمیت کو برقرارکھنے کیلئے مسجد کو محکمہ اوقاف سے والڈ سٹی اتھارٹی آف لاہور کوسپرد کرنے کا فیصلہ کیاہے۔لاہور میں جہاں ضرورت ہوگی وہاں پارکنگ پلازے بنائیںگے۔لاہور میں دسمبر تک صحت انصاف کارڈ دیئے جائیںگے۔شفافیت کے ساتھ منصوبوں کی

بروقت تکمیل ہمارا طر ہ امتیاز ہے۔انہوں نے کہا کہ لاہور میں شروع ہونے والے ترقیاتی منصوبوں سے شہر میں ترقی کا نیا باب رقم ہوگا۔وزیراعلیٰ نے کہا کہ بلوچستان میں آنے والے زلزلے سے قیمتی انسانی جانوں کے ضیاع پر دلی دکھ اوررنج ہوا ہے ۔مشکل کی گھڑی میں بلوچستان کے متاثرہ بہن بھائیوں کے ساتھ کھڑے ہیں ۔پنجاب

حکومت اورپنجاب کے عوام کی ہمدردیاں متاثرہ بہن بھائیوں کے ساتھ ہیں۔انہوںنے کہا کہ پنجاب حکومت بلوچستان کے زلزلہ متاثرین کو تنہا نہیں چھوڑے گی۔زلزلہ متاثرین کی ہر ممکن امداد کریںگے۔صوبائی وزیر ہاؤسنگ اسد کھوکھر نے اپنے خطاب میں کہا کہ وزیراعلیٰ عثمان بزدار نے اندرون لاہور کے شہریوں کیلئے میگا پراجیکٹ دے

کر ہمارے دل جیت لئے ہیں۔یہ منصوبہ علاقے کی اشد ضرورت ہے ۔ڈی جی ایل ڈی اے احمد عزیز تارڑ نے کہا کہ وزیراعلیٰ عثمان بزدار نے اس پراجیکٹ کیلئے ہر سطح پر پوری رہنمائی کی ۔منصوبے پر تیزی سے کام جاری ہے ۔انگریز دورکی بچھی بوسیدہ سیوریج لائن بھی تبدیل کی جارہی ہے ۔ حضرت داتا گنج بخش ؒ فلائی اوور کے

منصوبے کو وقت سے قبل مکمل کریںگے۔صوبائی وزراء اسد کھوکھر،خیال احمد کاسترو،سینیٹر اعجاز چوہدری،معاون خصوصی برائے اطلاعات حسان خاور،ایم پی اے سعدیہ سہیل، منتخب نمائندے ،پاکستان تحریک انصاف کے ٹکٹ ہولڈرز ،عہدیداران ،کارکنان اور لوگوں کی بڑی تعداد اس موقع پر موجود تھی۔قبل ازیں وزیراعلیٰ عثمان بزدارتقریب میں پہنچے تو ڈی جی ا یل ڈی اے احمد عزیز تاڑر نے پراجیکٹ کے بارے میں بریفنگ دی ۔

موضوعات:شیرانوالہ فلائی اوور