باکو(این این آئی)جمہوریہ آذربائیجان نے دارالحکومت باکو میں ایران کے سپریم لیڈر آیت اللہ علی خامنہ ای سے وابستہ مسجد اور ان کے ایلچی کے دفتر،دونوں کو بند کردیا ہے۔ایران کی نیم سرکاری خبررساں ایجنسی کے مطابق آذری حکام نے علی خامنہ ای کے نمایندے علیاکبراجاق نژاد کے

دفتراورمسجد کو سر بہ مہرکردیا ہے لیکن ایجنسی نے مزید تفصیل نہیں بتائی ۔علیاکبراجاق نژاد کے دفتر کی ویب سائٹ کے مطابق وہ 1996سے باکو میں ایرانی سپریم لیڈر کے ایلچی کے طورپرکام کررہے ہیں اور ان کا دفتر مسجد کے اندر ہی واقع ہے۔آذربائیجان کی وزارتِ داخلہ کے ترجمان ایسخان زاہدوف نے ایک بیان میں کہا کہ باکو میں مختلف مقامات میں کووِڈ19 کے کیسوں کی تعداد میں اضافہ ہورہا ہے،اس کے پیش نظر(مسجد اوردفتر کی)بندش کا اقدام ضروری ہوگیا تھا۔ترجمان نے واضح کیا کہ مسجد کی سرگرمیوں کو عارضی طور پر معطل کیا گیا ۔باکومیں ایرانی سفارت خانے نے ایک بیان میں کہا کہ وہ سفارتی چینلوں سے اس معاملہ کی پیروی کررہا ہے۔ان کا کہنا تھا کہ آذری حکام نے اس اقدام کے بارے میں ہمیں پیشگی خبردارنہیں کیا تھا۔ایران اورآذربائیجان کے درمیان پہلے ہی گذشتہ ہفتے کے دوران میں دوطرفہ کشیدگی میں اضافہ ہوا ہے۔آذری صدرالہام علیوف نے گذشتہ ہفتے ایران کو اپنے ملک کی سرحد کے نزدیک بری فوج کی مشق کے اعلان پرکڑی تنقید کا نشانہ بنایا تھا۔