اسلام آباد(نیوز ڈیسک)پاک فوج کے سابق ترجمان میجر جنرل (ر) اطہر عباس نے کہا ہے کہ مسلم لیگ (ن) کھل کر کیوں نہیں کہتی کہ تحریک انصاف کے دھرنے میں جنرل راحیل بھی ملوث تھے۔ نجی ٹی وی سے گفتگوکرتے ہوئے سابق ڈی جی آئی ایس پی آر اطہرعباس کا کہنا تھا کہ تحریک انصاف کی جانب سے پارلیمنٹ کے سامنے دیئے گئے دھرنے کی تحقیقات کے حوالے سے حکومت کمیشن بناناچاہتی ہے تو ضرور بنائے لیکن اگر جرنیلوں سے تحقیقات کرانی ہیں تو سابق آرمی چیف جنرل اسلم بیگ سے شروع کرنا ہو گا۔ انہوں نے کہاکہ سابق ڈی جی آئی ایس آئی صاف ستھرے کردارکے مالک تھے اور ان کوخفیہ ادارہ چلانے کاکوئی تجربہ نہیں تھا۔ تحریک انصاف کی مالی معاونت یامنتظم کرنے میں جنرل پاشاکے ملوث ہونے کاالزام درست ہو تو پھر یہ بھی درست ہو گا کہ اس وقت کے آرمی چیف جنرل کیانی بھی ملوث ہوں گے ،ڈی جی آئی ایس آئی آرمی چیف کے بغیرکوئی کام نہیں کر سکتا۔