لاہور( این این آئی)شہر میں پرچون سطح پر برائلر گوشت کی قیمت میں اضافے کے رجحان جاری ہے ۔ برائلر گوشت کی قیمت مزید 21روپے اضافے سے349روپے، زندہ برائلر مرغی کی قیمت15روپے اضافے سے241روپے فی کلو جبکہ فارمی انڈوں کی قیمت ایک روپے اضافے سے171روپے فی درجن کی سطح پر رہی۔یاد رہے کہ برائلر گوشت کی قیمت میں چار روز میں 50روپے
فی کلو اضافہ ریکارڈ کیا گیا ہے۔دوسری جانب آل پاکستان انجمن تاجران نے سہ ماہی ایڈ جسٹمنٹ کی مد میں بجلی کے فی یونٹ قیمت میں ایک روپے 65 پیسے اضافے کو مسترد کرتے ہوئے کہاہے کہ حالیہ اضافہ عالمی مالیاتی ادارے سے قرض کے حصول کیلئے عوام پر بوجھ ڈالنے کے معاہدے کا حصہ ہے ،اس اقدام سے مہنگائی کے بوجھ تلے دبے ہوئے طبقات کی جیبوں سے 90ارب روپے وصول کئے جائیں گے۔ ان خیالات کا اظہار مرکزی صدر اشرف بھٹی اور سیکرٹری جنرل محبوب علی سرکی نے اپنے مشترکہ بیان میں کیا ۔انہوں نے کہا کہ موجودہ دور حکومت میں ایک بھی ایسا دن نہیں آیا جبکہ عوام نے سکھ کا سانس لیا ہو ، بجلی گیس ،پیٹرولیم مصنوعات ، اشیائے خوردونوش کی قیمتیں آسمان کو چھو رہی ہیں اور اس کے باوجود حکومت سب اچھا کی رپورٹ دے کر عوام کی آنکھوں میں دھول جھونک رہی ہے ۔ انہوں نے کہا کہ سہ ماہی ایڈ جسٹمنٹ کی مد میں بجلی کے فی یونٹ قیمت میں1روپے65پیسے اضافہ نا قابل قبول ہے ، اس سے کمرشل استعمال کی بجلی مزید مہنگی ہو جائے گی جس سے مہنگائی کا ایک نیا طوفان آئے گا ۔ انہوں نے کہا کہ ایسا لگتا ہے کہ حکومت اس طرح کے اقدامات سے عوام سمیت تمام طبقات کو خود سڑکوں پر آنے کی دعوت دے رہی ہے او راگر ایسا ہوا تو حکومت حالات کو کنٹرول نہیں کر سکے گی ۔
