اسلام آباد(آن لائن)پاکستان ڈیموکریٹ موومنٹ(پی ڈی ایم ) کے ترجمان حافظ حمد اللہ نے کہا ہے کہ عمران خان آئے روزقوم کوبیوقوف بنانے کیلئے کہتے ہیں کہ مافیازکامکرنے نہیں دیتا ،یہ مافیا کون ہے ؟
اس کا بھی قوم کو بتائیں ۔اپنے ایک بیان میں انہوں نے کہاکہ عمران خان مافیا کے نام بتائیں اگر وہ بے بس ہیں تو پھر استعفیٰ دے کر گھر چلے جائیں ۔انہوں نے کہاکہ حقیقت تو یہ ہے کہ مافیا عمران خان کی کابینہ میں بیٹھا ہے جن میں چینی مافیا،دوائی مافیا، پٹرول مافیا وغیرہ شامل ہیں اور ان تمام مافیا کے لوگوں کی سرپرستی خان صاحب خود کررہے ہیں ۔انہوں نے کہاکہ اچھاخاصاپاکستان کو تین سالہ دورحکومت میں عمران خان نے بحرانستان بنادیا ہے جن میں مہنگائی کابحران،بیروزگاری کابحران،میرٹ کابحران،لوڈشیڈنگ کابحران،لاقانونیت کابحران،آئینی بحران، سیاسی اورجمہوری بحران، اداروں کا بحران شامل ہیں ۔حافظ حمد اللہ نے کہاکہ عمران خان تم قوم کونیاپاکستان نہ دے سکے ،نہ پراناپاکستان دے سکے اورنہ قائداعظم کاپاکستان دے سکے۔تمہیں خود معلوم نہیں کہ یہ کونساپاکستان ہے؟ مدینے کی ریاست بنانے کادعوی کرتے رہیں مگرآپ اور آپکی حکومت کی نااہلی نالائقی اور کردار نے مدینے کی ریاست کاچھرہ مسخ کردیا ہے ۔انہوں نے کہاکہ پی ڈی ایم مولانا فضل الرحمن کی قیادت میں قوم کو نااہل وزیراعظم عمران خان اور نالائق حکومت سے نجات دلائے گی ۔
