برسلز،واشنگٹن (این این آئی )رواں برس جون، جولائی اور اگست براعظم یورپ میں گزشتہ دو عشروں کے دوران گرم ترین مہینے ریکارڈ کیے گئے۔غیرملکی خبررساں ادارے کے مطابق یورپی یونین کے ارضیاتی مشاہدے کے پروگرام کوپیرنیکس کے اعداد و شمار میں کہاگیاکہ

سن 1991 سے سن 2020 تک درجہ حرارت اوسط سے ایک ڈگری زیادہ رہا۔ تاہم یورپ کے مختلف خطوں میں الگ الگ صورت حال نوٹ کی گئی۔ مثلا شمالی یورپ میں درجہ حرارت معمول سے کم رہا، مشرقی یورپ میں زیادہ، جبکہ بحیرہ روم کے ممالک میں درجہ حرارت میں شدید اضافہ دیکھا گیا ۔دوسری جانب امریکا کے شمالی مشرقی علاقوں میں تباہ کن سیلاب کے بعد امریکی صدر جو بائیڈن نے سخت الفاظ میں ماحولیاتی تبدیلی کے منفی اثرات سے خبردار کیا ہے۔ میڈیارپورٹس کے مطابق صدر بائیڈن نے متاثرہ علاقوں کے دورے کے دوران کہا کہ موسمیاتی تبدیلیوں کے تیزی سے بڑھتے اثرات ریڈ الرٹ کے مساوی ہوچکے ہیں۔ ان کے بقول، ملک اور دنیا خطرے میں ہے اور یہ کوئی مبالغہ نہیں بلکہ ایک حقیقت ہے۔ بائیڈن نے اس بات پر بھی زور دیا کہ اِن تباہ کاریوں کو مزید سنگین ہونے سے قبل ہی روکنا ہوگا۔ امریکی صدر نے اسکاٹ لینڈ کے شہر گلاسگو میں رواں برس نومبر سے شروع ہونے والی عالمی ماحولیاتی کانفرنس میں اپنی شرکت کا اعلان بھی کیا۔