کراچی(این این آئی)سول ایوی ایشن اتھارٹی(سی اے اے)نے اندرون ملک فضائی سفر کے لیے نیا سفری ہدایت نامہ جاری کردیا ہے۔اندرون ملک فضائی سفر کے لیے 10 ستمبر سے مکمل ویکسینیشن لازمی قرار دے دی گئی ہے۔

ڈپٹی ڈائریکٹر ایئرٹرانسپورٹ نے اس ضمن میں باقاعدہ نوٹی فکیشن بھی جاری کردیا ہے۔سی اے اے کے ڈپٹی ڈائریکٹر ایئر ٹرانسپورٹ کی جانب سے جاری کردہ نوٹی فکیشن کے مطابق 18 سال سے زائد عمر کے افراد مکمل ویکسینیشن کی صورت میں ہی اندرون ملک فضائی سفرکرسکیں گے۔نوٹی فکیشن کے تحت ایک ڈوز لگانے والے پاکستانی مسافروں کو پہلے دی گئی سفری رعایت 10 ستمبر سے واپس لے لی جائے گی۔ذرائع کے مطابق سی اے اے کی مجاز اتھارٹی کی ہدایت پر فیصلہ کیا گیا ہے کہ متعلقہ حکام، اندرون ملک آپریٹ ہونے والی تمام ایئرلائنز سے اس پابندی پر سختی سے عمل درآمد کرائیں۔