اسلام آباد (این این آئی)40 لاکھ خاندانوں کو غربت سے نکالنے کا پلان تیار،حکومت نے ”کامیاب پاکستان” پروگرام 29 جولائی سے لانچ کرنے کا فیصلہ کرلیا ۔ بدھ کو مشیر خزانہ شوکت ترین اور وزیراعظم کے معاون خصوصی عثمان ڈار کے درمیان ملاقات ہوئی جس میں وزیر مملکت برائے اطلاعات فرخ حبیب بھی شریک ہوئے۔ ملاقات میں فیصلہ کیاگیاکہ

وزیراعظم 29 جولائی کو حکومت کے سب سے بڑے فلاحی منصوبے کا آغاز کریں گے، مرکزی تقریب کنونشن سینیٹر اسلام آباد میں ہو گی، عثمان ڈار کو تیاریوں کا ٹاسک سونپ دیا گیا۔ شوکت ترین نے کہاکہ وزیراعظم نے عوامی فلاح کے منصوبوں میں تیزی لانے کا فیصلہ کیا ہے، ملکی سطح پر ”کامیاب پاکستان”پروگرام 29 جولائی سے لانچ ہوگا۔شوکت ترین نے کہاکہ کامیاب پاکستان حکومت کا فلاحی ایجنڈے پر مشتمل سب سے بڑا پروگرام ہو گا، ہاوسنگ منصوبے، اسکل ڈویلپمنٹ اور آسان قرضوں کامیاب پاکستان پروگرام کا حصہ ہوں گے، شوکت ترین نے کہاکہ ہیلتھ کارڈز اور زرعی خدمات کو بھی کامیاب پاکستان پروگرام میں شامل ہوں گے، 40 لاکھ خاندانوں کو غربت سے نکالنے کیلئے جامع پلان بنایا گیا ہے۔ عثمان ڈارنے کہاکہ اربوں روپے کا بجٹ مختص، 5 لاکھ روپے تک بغیر سود قرضہ دیا جائیگا، کامیاب کسان پروگرام کے تحت کسانوں کو سود کے بغیر قرض اور کاروبار کیلئے رقم ملے گی۔ انہوںنے کہاکہ حکومت ہر خاندان میں سے 1 فرد کو ٹیکنیکل ایجوکیشن دے گی، منصوبے کے ذریعے ملک بھر کی عوام کو لو کاسٹ ہاوسنگ اسکیم میں شامل کیا جائیگا، مائیکروفنانسنگ کے ذریعے نچلے طبقے کی مدد کا طریقہ کار بھی طے کیا گیا ہے‎