اسلام آباد (مانیٹرنگ ڈیسک/این این آئی )وزیر اعظم کے معاون خصوصی ڈاکٹر فیصل سلطان نے اعلان کیا ہے کہ عید الاضحیٰ پر پبلک ٹرانسپورٹ بند ہو گی ۔
نجی ٹی وی ہم نیوز کے پروگرام ہم مہر بخاری سے گفتگو کے دوران انکا کہنا تھا کہ عید پر سیاحتی مقامات پر جانے کیلئے کورونا ویکسی نیشن سرٹیفکیٹ دکھانا لازمی ہو گا۔انہوں نے کہا کہ اگر احتیاط نہ کی گئی تو کورونا کیسز بڑھ سکتے ہیں، ماسک کے استعمال سے کورونا کی چوتھی لہر سے محفوظ رہا جا سکتا ہے۔دوسری جانب وزیراعظم کے معاون خصوصی برائے قومی صحت ڈاکٹر فیصل سلطان نے کہا ہے کہ خاندان کی منصوبہ بند ی کرتے وقت اپنے وسائل کو مد نظر رکھیں ۔ عالمی یوم آبادی کے سلسلہ میں منائے جانے والے ہفتہ کے حوالے سے جاری اپنے بیان میں وزیراعظم کے معاون خصوصی نے کہا کہ اولاد کی خواہش ہر میاں بیوی کا حق ہے لیکن یہ بھی اہم ہے کہ خاندان کی منصوبہ بندی کرتے وقت اپنے وسائل کو مد نظر رکھیں اور اس چیز میں توازن رکھیں کہ ہم اپنے بچوں کی نشو و نما اور تعلیم و تربیت کیسیکر سکیں گے اور اس کو بہترین طور پر کیسے سر انجام دیں گے لہذا اس صورت میں توازن قائم رکھنے کے لئے اس بات پر توجہ دینا بہت اہم ہے کہ ہم اپنے بچوں کو پاکستان کا بہترین شہری بنانے کے لئے کیا سہولیات فراہم کر سکتے ہیں۔
