اسلام آباد (مانیٹرنگ ڈیسک/آن لائن )اردو کے ممتاز فکشن نگار، صحافی اور معروف کالم نگار مسعود اشعر انتقال کرگئے۔داماد حسان نے اردو کے نامور لکھاری کی 90 برس کی عمر میں انتقال کی خبر کی تصدیق کی ہے۔نجی ٹی وی جیو کے مطابق

مسعود اشعر کی نماز جنازہ کل صبح 10 بجے بی بلاک ڈی ایچ اے لاہور میں ادا کی جائے گی۔وہ روزنامہ جنگ سے بطور کالم نگار طویل عرصہ وابستہ رہے، مسعود اشعر کو ان کی ادبی خدمات پر 2015ء میں ستارہ امتیاز سے بھی نوازا گیا۔دوسری جانب وزیراعلیٰ پنجاب سردار عثمان بزدارنے معروف کالم نگارمسعوداشعر کے انتقال پر دکھ اور افسوس کا اظہارکیا ہے۔وزیراعلیٰ عثمان بزدار نے سوگوار خاندان سے دلی ہمدردی و اظہار تعزیت کرتے ہوئے دعا کی کہ اللہ تعالی مرحوم کی روح کو جوار رحمت میں جگہ دے اور سوگوار خاندان کو صبر جمیل عطا فرمائے۔وزیراعلیٰ نے کہا کہ مسعود اشعر مرحوم کالم نگاری میں منفرد مقام رکھتے تھے۔مسعود اشعرمرحوم نے کالم نگاری کے ذریعے سماجی اور معاشرتی مسائل کو اجاگر کیا۔انہوں نے کہا کہ کالم نگاری کے شعبہ میں مرحوم کی خدمات کو تادیر یاد رکھا جائے گا۔