لاہور(این این آئی) جوہرٹائون میں بارود سے بھری گاڑی پارک کرنے والا گرفتار دہشتگرد عید گل اوراس کے دو سگے بھائی فورتھ شیڈول میں شامل نکلے جبکہ عیدگل اور پیٹرپال نے

پیسوں کی لالچ میں دھماکہ کیا۔جوہر ٹائون دھماکے کی تحقیقات میں اہم انکشافات سامنے آئے ہیں ۔ ذرائع کا کہنا ہے کہ زیرحراست عیدگل اور اس کے 2بھائی فورتھ شیڈول میں شامل ہیں جبکہ عید گل گزشتہ سالوں میں متعدد مرتبہ بیرون ملک جاچکا ہے۔عید گل وزیرستان سے جھنگ میں خاندان کے ساتھ رہائش رکھے ہوئے تھا اور کام کے لیے بھائیوں کے ساتھ راولپنڈی میں زیادہ وقت گزارتا تھا، عید گل اور پیٹرپال کا چند سال قبل رابطہ ہوا ، دونوں نے پیسوں کی لالچ میں دھماکہ کیا۔ذرائع کے مطابق عید گل کافورتھ شیڈول میں ہونے کے باوجود بیرون ملک اور دوسرے شہروں میں جانا پولیس کی کارکردگی پر سوالیہ نشان ہے ، عید گل سے مزید تفتیش کی جا رہی ہے اور مزید گرفتاریاں بھی متوقع ہیں۔حکام کاکہناہے کہ ملزم عید گل نے بارود سے بھری گاڑی جوہر ٹائون میں پارک کی تھی، ملزم کو گزشتہ روزراولپنڈی سے گرفتارکیاگیا تھا جبکہ تفتیش کیلئے زیرحراست ملزمان کی تعداد سات ہوگئی ہے۔