لاہور(مانیٹرنگ ڈیسک، این این آئی )فلور ملز مالکان نے لاہور اور فیصل آباد میں دو روز کیلئے آٹے کی سپلائی روک دی ، چیئرمین فلور ملز ایسوسی ایشن کی جانب سے کہا گیا کہ آج اور کل آٹے کی سپلائی نہیں دیں گے ۔فیصل آباد میں ضلع کی 48فلور ملز روزانہ 70 ہزار تھیلے
مارکیٹ میں فراہم کرتے ہیں ، ملز کی بندش کے باعث مارکیٹ میں آٹے کی قلت کا خدشہ پیدا ہو گیا ہے ۔چیئرمین فلور ملز کی جانب سے کہا گیا کہ ٹیکسز پر نظر ثانی نہ ہوئی تو احتجاج کی مدت اور دائرہ کار بڑھا دیں گے ۔دوسری جانب فیڈرل بورڈ آف ریونیو نے فلور ملز پر عائد کیے جانے والے سیلز ٹیکس سے متعلق اہم وضاحت جاری کردی۔نجی ٹی وی کے مطابق ایف بی آر نے گندم چوکر پر عائد ہونے والا 17 فیصد سیلز ٹیکس واپس لینے کا فیصلہ کرتے ہوئے ایف ایم سی جی فلور ملز سے متعلق دوبارہ وضاحت جاری کردی۔ایف بی آر ترجمان کے مطابق فنانس بل2021 میں فلورملز و ریفائنری ریٹیلرز کو سہولت دی گئی ہے، مجموعی کاروباری حجم (ٹرن اوور)کی بنیاد پر کم ازکم ٹیکس شرح کو تبدیل کردیاگیا ہے۔ترجمان ایف بی آر کے مطابق فنانس بل میں غلطی کی ترمیم کے ذریعے تصحیح کردی جائے گی ،فلور ملز پر لاگو کم ازکم ٹیکس ٹرن اوور کے 0.25 فیصد رہے گا،ٹرن اوور پر 1.25 فیصد سیلز ٹیکس عائد کرنے کا تاثر غلط دینے کی کوشش کی جارہی ہے۔ایف بی آر نے بتایا کہ حکومت نے گندم چوکر پر 17 فیصد ٹیکس عائد کرنے کا فیصلہ کیا تھا جسے اب واپس لیا جارہا ہے۔
