اسلام آباد(مانیٹرنگ ڈیسک)صوبائی دارالحکومت لاہور کے یادگار میٹرو سٹیشن کے قریب میٹرو بس میں آتشزدگی سے بس جل کر خاکستر ہو گئی۔ریسکیو حکام کے مطابق میٹرو بس میں آگ وائرنگ شارٹ ہونے کے باعث لگی،آگ لگنے کے بعد میٹرو بس اتھارٹی کا عملہ فوری طور پر جائے حادثہ پر پہنچ گیا جب کہ بس سروس تعطل کا شکار ہو گئی۔ریسکیو حکام کا کہنا ہے کہ فائر بریگیڈ کا عملہ آگ بجھانے میں مصروف ہے۔آگ لگنے کی وجہ سے بس جل کر خاکستر ہو گئی۔حادثے کے نتیجے میں کسی مسافر کے زخمی ہونے کی اطلاعات نہیں ملیں۔تباہ شدہ بس کو کرین کی مدد سے ٹریک سے اٹھا کر میٹرو بس سروس ورکشاپ میں منتقل کر دیا گیا۔واقعے کے بعد میٹرو بس اتھارٹی کے عہدیداروں کا کہنا ہے کہ حادثے کی تحقیقات مکمل کی جائیں گی اور ملوث افراد کے خلاف قانونی کارروائی عمل میں لائی جائے گی۔یاد رہے یہ میٹرو بس ٹریک پر چند ہی روز میں تیسرا تشویش ناک واقعہ ہے۔