لاہور(نیوز ڈیسک) سری لنکا کے خلاف دو ٹی ٹوئنٹی میچز کے لیے ٹیم میں تین تبدیلیاں کی جائیں گی۔ فاسٹ بولر وہاب ریاض کی ٹیم میں شمولیت کا فیصلہ کر لیا گیا ہے تاہم حتمی فیصلے سے قبل ان کی فٹنس جانچی جائے گی، فٹنس مسائل کے سبب وہ ٹیسٹ اور ون ڈے سیریز سے آو¿ٹ ہو گئے تھے۔ عمر اکمل کا نام فی الحال ٹیم لسٹ میں شامل نہیں کیا گیا۔ ٹیم کی حتمی منظوری چیئرمین پی سی بی سے لے کر کل اعلان کیا جائے گا۔ سلیکشن کمیٹی کی جانب سے تر تیب دی گئی فہرست میں کپتان شاہد آفریدی کے علاوہ محمد حفیظ اور احمد شہزاد بطور اوپنر ٹیم میں شامل ہونگے جبکہ دیگر کھلاڑیوں میں سرفراز احمد، بابراعظم، رضوان احمد، انور علی، عماد وسیم شامل ہیں۔ چیئرمین پی سی بی سے منظوری کے لیے تیار کی جانے والی حتمی فہرست میں نعمان انور کی جگہ بلال آصف کا نام شامل کیا گیا ہے جبکہ وہاب ریاض کی ٹیم میں شمولیت فٹنس ٹیسٹ سے مشروط کی گئی ہے۔ وہاب ریاض کے دستیاب نہ ہونے کی صورت میں راحت علی کے ٹیم میں شامل ہونے کے امکانات روشن ہیں۔ وہاب ریاض سری لنکا کے خلاف ون ڈے سیریز میں زخمی ہو گئے تھے، ان کے ہاتھ پر چوٹ لگی تھی اور ہیئر لائن فریکچر کا انکشاف ہوا تھا جس کے بعد وہ وطن واپس پہنچ گئے تھے۔ دوسری طرف عمر اکمل تاحال سلیکٹرز کی نظر کرم کے منتظر ہیں۔ ورلڈ کپ کے بعد ان پر انٹرنیشنل کرکٹ کے دروازے بند ہیں۔