لاہور (آن لائن) پنجاب حکومت نے رواں مالی سال کے 9 ماہ کے دوران مختلف مصنوعات سمیت حکومت کی کارکردگی کے حوالے سے تشہیری مہم پر 65کروڑ روپے خرچ کر ڈالے۔ بتایا گیا ہے کہ مذکورہ رقم لاہور سمیت صوبے بھر میں لگائے گئے رمضان بازاروں اور

ماڈل بازاروں کی تشہیر پر بھی خرچ کی گئی جبکہ عوامی حلقوں کا کہنا ہے کہ تشہیری مہم کے حوالے سے بزدار سرکار سابقہ حکومت کے مقابلے میں کسی سے کم نہیں رہی۔دوسری جانب وزیراعظم عمران خان نے وزیراعلیٰ پنجاب سردار عثمان بزدار سے ماہ رمضان میں چینی کی فراہمی اور فروخت سمیت چینی کی کوالٹی کے بارے میں تفصیلی رپورٹ طلب کرلی ہے۔ بتایا گیا ہے کہ وزیراعظم عمران خان نے اس سلسلے میں جاری کئے گئے نوٹیفکیشن میں وزیراعلیٰ پنجاب سے خصوصی طور پر جو معلومات فراہم کرنے کے لئے کہا گیا ہے ان میں پاکستان تحریک انصاف کے سینئر رہنما جہانگیر ترین اور شریف فیملی کی شوگر ملوں سے رمضان بازاروں میں فراہم کی گئی چینی کی کوالٹی اور بیگ کے وزن کی معلومات شامل ہیں جبکہ ذرائع کا کہنا ہے کہ رواں رمضان المبارک کے مہینے میں لگائے گئے رمضان بازاروں میں پنجاب حکومت نے شوگر ملوں سے 1 لاکھ 50 ہزار ٹن چینی 80 روپے فی کلو کے حساب سے خرید لی۔ جس میں سے 22ہزار ٹن چینی رمضان بازاروں میں فروخت کی گئی اور حکومت نے چینی کی مد میں شہریوں کو 40کروڑ روپے کی سبسڈی فراہم کی۔ جو 18 روپے فی کلو پر بنتی ہے۔