لاہور(نیوز ڈیسک) سری لنکا کیخلاف ٹی ٹوئنٹی سیریز کیلئے قومی ٹیم کا اعلان چوتھے ون ڈے کے بعد بدھ کو متوقع ہے، وہاب ریاض کی شمولیت کا فیصلہ عید کے بعد فٹنس کا حتمی جائزہ لینے کے بعد کیا جائے گا تاہم عمر اکمل کیلئے اسکواڈ کا دروازہ نہیں کھلے گا،بلال آصف کو موقع دیے جانے کا امکان ہے۔تفصیلات کے مطابق پاکستان و سری لنکا کے مابین 2ٹی ٹوئنٹی میچز30جولائی اور یکم اگست کو کھیلے جائیں گے، سلیکٹرز نے مختلف ناموں پر غور کرتے ہوئے سیریز کیلئے اسکواڈ کی ابتدائی فہرست مرتب کرلی، البتہ بعض فیصلوں کیلئے تھوڑا انتظار ناگزیر ہوچکا ہے، اس وجہ سے حتمی ٹیم کا اعلان آئی لینڈرز کیخلاف بدھ کو شیڈول چوتھے ون ڈے کے بعد کیا جائے گا، ٹیسٹ سیریز کے دوران زخمی ہونے والے وہاب ریاض کا فریکچر کافی حد تک ٹھیک ہوچکا لیکن بولنگ پریکٹس کی اجازت دینے سے قبل پی سی بی ڈاکٹرز عید کے بعد نیشنل کرکٹ اکیڈمی میں معائنہ کرینگے، ون ڈے سیریز میں کوئی ہنگامی صورتحال نہ ہوئی تو پیسر کو ٹی ٹوئنٹی مقابلوں سے پہلے سری لنکا روانہ نہیں کیا جائے گا۔ذرائع کے مطابق ون ڈے اسکواڈ سے ڈراپ ہونے والے محمد سمیع کو مختصر فارمیٹ کیلئے بھی زیر غور نہیںلایا گیا، محمد عرفان کو شامل رکھنے کا فیصلہ کرتے ہوئے مینجمنٹ سے فٹنس کے بارے میں رائے طلب کی جائے گی، عمر اکمل کو بھی این سی اے رپورٹ نہ کرنے کی مزید سزا دی جا سکتی ہے، شعیب ملک اور محمد رضوان کی عمدہ فارم نے ان کی واپسی کے امکانات مزید مسدود کردیے،آل راﺅنڈر حماد اعظم کی چھٹی کراتے ہوئے بلال آصف کو موقع دیا جائے گا جو اس وقت ون ڈے اسکواڈ کے ساتھ موجود ہیں۔