لاہور(این این آئی) مسلم لیگ (ن) کے صدر شہباز شریف نے حکومت کو مہنگائی پر کنٹرول نہ کرنے پر تنقید کا نشانہ بناتے ہوئے کہا کہ اس حکومت نے کم آمدنی والے طبقات سے تعلق رکھنے والے افراد کی زندگی کو جہنم بنا دیا ہے۔شہباز شریف نے ادارہ شماریات کی رپورٹ پر ردعمل میں اپنے ٹویٹ میں حکومت کو ہدف تنقید بناتے ہوئے کہا کہ پاکستان بیورو آف شماریات کے جاری کردہ حقائق اور اعداد و شمار

خصوصا مہنگائی، اشیائے خوردونوش پر افراط زر کی شرحوں میں بتدریج اضافے کی نشاندہی کرتے ہیں۔شہباز شریف کا کہنا تھا کہ اس حکومت نے کم آمدنی والے طبقات سے تعلق رکھنے والے افراد کی زندگی کو جہنم بنا دیا ہے، نااہلی ، لالچ اور بے حسی کا مجموعہ بری طرح نقصان دہ ہے۔دوسری جانب پاکستان مسلم لیگ (ن) لاہورکے صدرمحمد پرویز ملک،جنرل سیکرٹری خواجہ عمران نذیر نے کہا ہے کہ لاہور ہائی کورٹ کے تین رکنی بنچ نے اعتراف کیا نہ کمیشن نہ کک بیکس نہ اختیارات سے کسی کو فائدہ یا ٹی ٹی کا ثبوت پیش نہ کر سکی،حکومت سے سوال پوچھتے ہیں کہ تین سال سے نوازشہباز کی کردار کشی کررہے ہیں ۔ اپنے بیان میں انہوںنے کہاکہ فیصلوں سے ثابت ہوچکا نیب ریفرنس الف لیلیٰ کی داستان اور بیب نیازی گٹھ جوڑ کے علاوہ کچھ نہیں ، نیازی خوفزدہ ہے ن لیگ کی کامیابیوں کا مقابلہ نہیں کر سکتا،عام آدمی ناجائز منافع خوروں کے رحم و کرم پر ہے جبکہ دو کلو چینی کے حصول کیلئے رمضان بازاروں میں لوگ کا رش کورونا کو دعوت عام دے رہا ہے،جس طرح کی گندی حکمرانی عمران نیازی کی جانب سے کی گئی ہے اس کی مثال نہیں ملتی،عوام بھوکے پیاسے مررہے ہیں علاج کے لئے میڈیسن میسر نہیں ہیں اور نا اہل حکمرانوں انتقامی کارروائیوں میں مصروف ہیں۔ انہوںنے کہاکہ پنجا ب میں آٹامافیا،چینی مافیا کے بعد مہنگائی مافیا عروج پر جارہا ہے، پنجاب میں 20کلو آٹے کا تھیلا 1333 کا ہوگیا ہے اور کہاچینی پتنگوں کی طرح آسمان میں اڑارہی ہے اور تبدیلی سرکار کہیں نظر نہیں آرہی پنجاب کے وزیر خوراک اور وزیر صنعت نیب اور ایف آئی اے کے خوف سے منظرعام سے غائب ہیں ۔