کراچی (نیوز ڈیسک) عوام کو بجٹ کی مار پڑنا شروع ہوگئی، فیڈرل بورڈ آف ریونیو نے بجلی اور ٹیلی فون کے بلوں پر ٹیکس لگادیا، 600 روپے سے800 روپے تک بجلی کے صارفین 100 روپے ٹیکس دیں گے۔ذرائع کے مطابق فیڈرل بورڈ آف ریونیو نے نئے مالی سال سے بجلی اور ٹیلی فون کے بلوں پر ٹیکس عائد کیا ہے، جس کے تحت 75 ہزار روپے یا اس سے زائد بل کے صارفین پر ساڑھے 7 فیصد ٹیکس لگایا گیا ہے، جبکہ 400 روپے سے کم والے بلوں کے گھریلو صارفین کو اس ٹیکس سے مستثنی رکھا گیا ہے، تاہم 400 روپے سے600 روپے بل والے کمرشل صارفین کو 80 روپے ٹیکس دینا ہوگا، جبکہ 600 روپے سے 800 روپے والے صارفین کو بل کے ساتھ100 روپے ٹیکس عائد کیا گیا ہے،800 سے ایک ہزار روپے والے بل پر160 روپے، ایک ہزار سے ڈیڑھ ہزار روپے والے بل پر300 روپے،، جبکہ ساڑھے 4 ہزار سے6 ہزار روپے والے بل پر ساڑھے 400 روپے ٹیکس دینا ہوگا، 20ہزار روپے سے زائد کمرشل صارفین پر 10 فیصد اور صنعتی صارفین کے بل پر 5 فیصد ٹیکس لگایا گیا ہے، اسی طرح ایک ہزار روپے سے کم ٹیلی فون کے بل کو ٹیکس سے چھوٹ ہوگی، جبکہ ایک ہزار روپے سے زائد بل پر 10 فیصد ودہولڈنگ ٹیکس دینا ہوگا۔