اسلام آباد (این این آئی)پاکستان مسلم لیگ (ن)کے صدر اور قائد حزب اختلاف شہبازشریف نے کہا ہے کہ معاشی بربادی، عوامی بدحالی ، مہنگائی اور بے روزگاری دیکھ کر دل خون کے آنسو رو رہا ہے ،افسردہ ہوں جو حکومت قوم کو آٹا چینی فراہم نہیں کرسکتی، وہ اسے کورونا کی ہلاکت خیزی سے کیسے بچائیگی؟۔پاکستان مسلم لیگ (ن)کے صدر نے ارکان پارلیمان سے ملاقات میں

گفتگو کرتے ہوئے کہا کہ معاشی بربادی، عوامی بدحالی ، مہنگائی اور بے روزگاری دیکھ کر دل خون کے آنسو رو رہا ہے ۔انہوں نے کہا کہ ایک کلو چینی خریدنے کے لئے قطاروں میں کھڑی ماوں بہنوں کو دیکھ کر افسوس سے سر جھک جاتا ہے ،افسردہ ہوں کہ جو حکومت قوم کو آٹا چینی فراہم نہیں کرسکتی، وہ اسے کورونا کی ہلاکت خیزی سے کیسے بچائے گی؟۔انہوں نے کہا کہ رمضان المبارک میں اس نوعیت کی افراتفری پہلے نہیں دیکھی ،رمضان بازاروں میں اشیاکی قیمتیں اور معیار سے متعلق اطلاعات وشکایات افسوسناک ہے ۔پارٹی رہنماوں نے شہبازشریف کو رہائی پر مبارک، سیاسی انتقام کا جرات وبہادری سے مقابلہ کرنے پر خراج تحسین پیش کیا ۔شہبازشریف نے پارٹی رہنماوں اور کارکنان کے جذبات، حمایت اور مخلصانہ وابستگی کو سراہا۔سابق وزیراعظم شاہد خاقان عباسی سمیت مختلف علاقوں سے تعلق رکھنے والے ارکان پارلیمان، پارٹی ٹکٹ ہولڈرز نے ملاقات کی ۔خیبرپختونخوا سے ارکان پارلیمنٹ نے بھی پارٹی صدر اور قائد حزب اختلاف سے ملاقات کی۔