آسلام آباد( آن لائن ) حکومت مخالف اتحاد (پی ڈی ایم) کے سربراہ مولانا فضل الرحمان اور مسلم لیگ( ن) کے تا حیات قائد نوازشریف کے درمیان ٹیلی فونک رابطہ ہو ا ہے جس میں ملک کی مجموعی سیاسی صورتحال پر تبادلہ خیال کیا گیا ۔ ذرائع کاکہنا ہے کہ نوازشریف نے
مولانا فضل الرحمان کی صحت بارے دریافت کیا ، دونوں قائدین نے ایک دوسرے کو رمضان المبارک کی مبارک باد بھی دی ، ٹیلفونک رابطے میں دونوں رہنماؤں نے ملکی سیاسی صورتحال پر تبادلہ خیال کرنے کے ساتھ ساتھ پی ڈی ایم کی آئیندہ کی حکمت عملی پر بھی بات چیت کی اور پی ڈی ایم کی تحریک کو تیز کرنے اور ضمنی الیکشن میں حکومت کی عوام میں غیر مقبولیت پر تفصیلی تبادلہ خیال کیا گیا ۔ذرائع کا کہنا ہے کہ نوازشریف نے پیپلز پارٹی اور اے این پی کا معاملہ مولانا پر چھوڑ دیا ہے او ر کہا ہے کہ آپ پرپوری طرح اعتماد ہے ہم اب بھی پی ڈی ایم کو متحد دیکھنا چاہتے ہیں۔ شاہد خاقان عباسی اپنے بیان کی وضاحت کر چکے ہیں۔ پی ڈی ایم کے سربراہ مولانا فضل الرحمان نے کہا کہ پی ڈی ایم کو متحد رکھنے کیلئے پیپلز پارٹی کی قیادت سے بھی رابطے میں ہوں، مسلم لیگ ن لیگ اور پیپلز پارٹی کے رہنماؤں کی طرف سے ایک دوسرے کے خلاف بیان بازی نہیں ہونی چاہیے۔
