کراچی ( آن لائن ) سابق وزیراعظم نواز شریف اور ان کی صاحبزادی مریم نواز کے ترجمان محمد زبیر نے کہا ہے کہ زیر اعظم کو بار بار اپنی معاشی ٹیم تبدیل کرنا پڑ رہی ہے،ڈھائی سال میں تین وزیر خزانہ، چار فنانس سیکریٹری تبدیل ہوچکے۔مسلم لیگ نون کے سینئر رہنما نے کہا کہ حماد اظہر نے بھی معیشت کے حوالے سے
بڑے بڑے دعوے کیے ہیں، حماد اظہر کی پریس کانفرنس اور ٹویٹ سے مہنگائی کم نہیں ہوتی۔ کراچی میں پریس کانفرنس کرتے ہوئے ترجمان کا کہنا تھا کہ ایک سال سے چینی بحران چل رہا ہے، ان کی ناک کے نیچے پیسے بنائے جارہے ہیں، چینی بحران پر تحقیقات اور ایف آئی آر کاٹ رہے ہیں،مگر چینی 110روپے کلو مل رہی ہے۔ محمد زبیر نے کہا کہ عوام کے لیے ہر نیا دن مشکل سے مشکل تر ہوتا جارہا ہے، عمران خان دعویٰ کرتے تھے کہ میرے پاس بہترین ٹیم ہے۔انہوں نے کہا کہ عمران خان سیکوئی پوچھیکہ تین سال میں معیشت کا یہ حال کیوں کیا، یہ بتائیں کہ گروتھ ریٹ اتنا کم کیوں ہوا، یہ کورونا کو جواز بتاتے ہیں جبکہ کورونا سے باقی ممالک کی معیشت تباہ نہیں ہوئی۔نون لیگی رہنما نے کہا کہ یہ لوگوں کو غربت میں دھکیلنے پر احساس پروگرام بڑھانے پر فخر کرتے ہیں، ایک کروڑ نوکریاں دینی تھیں مگر لاکھوں لوگوں کو بے روزگار کردیا گیا۔انہوں نے کہا کہ اس سال جمع کیے گئے ٹیکس کا 80 فیصد قرضوں کی ادائیگی میں جائے گا،گزشتہ تین سال میں اخراجات آمدن سے ریکارڈ زیادہ ہیں، ان کے غلط فیصلوں سے عوام پس رہے ہیں، اگر یہی حکومت رہی تو ڈیفنس بجٹ کے لیے بھی قرضہ لینا پڑے گا۔
