لاہور(مانیٹرنگ +این این آئی) نیب نے مریم نواز کی 26 مارچ کی پیشی منسوخ کرنے کا فیصلہ کر لیا ہے، اس بات کا دعویٰ معروف تجزیہ کار عمران خان نے کیا، انہوں نے دوران پروگرام کہا کہ نیب کے بڑے افسران کے درمیان حالات کے تناظر میں ایک اہم میٹنگ ہوئی ہے، جس میں مختلف آپشنز پر غور کیا گیا ہے،
عمران خان کے مطابق پہلا آپشن یہ تھا کہ مریم نواز کی 26مارچ کی پیشی کو منسوخ کر دیا جائے، دوسرے آپشن میں مریم نواز کو گھر سوالات بھجوانے کی بات کی گئی، نیب کے اس سوال نامے کا جواب مریم نواز گھر میں تیار کرکے ارسال کر دیں۔ دوسری جانب مسلم لیگ (ن) کی نائب صدر مریم نواز کی پیشی کے موقع پر نیب لاہور میں تیاریاں مکمل کر لی گئیں۔ نجی ٹی وی کے مطابق مسلم لیگ (ن) کی نائب صدر مریم نواز کی پیشی پر کورونا ایس و پیز کا مکمل خیال رکھا جائے گا جبکہ تمام اسٹاف ماسک اور حفاظتی کٹ پہن کرمریم نوازسے تفتیش کرے گا۔مریم نواز اور جے آئی ٹی ٹیم کے درمیان شیشے کی دیوار بھی ہوگی، تفتیشی روم کو مکمل طور پر ڈس انفکٹ کیا گیا ہے۔خیال رہے نیب نے مریم نواز کو 2مقدمات میں طلب کررکھا ہے، وہ چوہدری شوگر ملز،منی لانڈرنگ،جاتی امرا اراضی منتقلی کیس میں پیش ہوں گی، نیب کی جوائنٹ انویسٹی گیشن ٹیم مریم نواز سے تحقیقات کرے گی۔یاد رہے گذشتہ سال 11 اگست کو بھی نیب نے مریم نواز کوطلب کیا تھا مگر ہنگامہ.آرائی کے باعث طلبی منسوخ کردی گئی تھی۔
