کراچی(این این آئی)اسکن کیئرمصنوعات متعارف کروانے والی سیلیبرٹیز میں تازہ ترین انٹری سابق کرکٹ کپتان شاہد آفریدی کی ہے۔لالا کے نام سے معروف شاہد آفریدی نے ہوپ کیئرکے بینرتلے یوم پاکستان 23 مارچ کو اوہ لالا کے نام سے اسکن کیئررینج متعارف کروائی۔آفریدی نے ٹوئٹرفالوورز کے ساتھ یہ خبر شیئرکرتے

ہوئے لکھا یوم پاکستان کے موقع پر میں اوہ لالا لیکر آرہا ہوں، جس کے تحت مرد و خواتین دونوں کے لئے پریمیم معیارکی ذاتی نگہداشت کی مصنوعات پیش کی جارہی ہیں تا کہ وہ خود کو پر اعتماد محسوس کریں اور ستارے کی طرح چمکیں۔شیئرکی جانے والی تشہیری ویڈیو میں شاہد آفریدی نے والدین اور پرستاروں کا شکریہ کیا جنہوں نے انہیں لالا اور بوم بوم کہہ کرپکارا۔اسٹارکرکٹر کے مطابق میں میدان میں یا آف فیلڈ کچھ بھی کرتا ہوں ،اپنے پرستاروں اور ملک والوں کو کچھ دینے کی کوشش کرتا ہوں۔ اوہ لالا کی ٹیگ لائن بتاتے ہوئے اختتامی لائن میں لالا نے کہا اوہ لالا ، ہمیشہ چمکتے رہو، لوگوں کے دلوں میں بستے رہو۔اسکن کیئررینج متعارف کروانے سے قبل شاہد آفریدی ہوپ ناٹ آئوٹ کے نام سے کپڑوں کا برانڈ بھی چلا رہے ہیں۔آفریدی سے قبل جلد کی نگہداشت کیلئے اپنی مصنوعات متعارف کروانے والوں میں اعجاز اسلم ،عائشہ عمر، وسیم بادامی ، کرکٹرشعیب ملک اور گلوکارہ کومل رضوی کا نام بھی شامل ہے۔عائشہ عمر نے رواں سال خواتین کے عالمی دن 8 مارچ کو عائشہ او بیوٹی کے نام سے رینج متعارف کروائی جبکہ شعیب اورکومل رضوی باہمی اشتراک سے شعیب ملک بائی کومل رضوی لیکرآئے ہیں۔