اسلام آباد،لاہور ( آن لائن)مسلم لیگ (ن) نے 19 جنوری کو الیکشن کمیشن کے باہر لاکھوں افراد لانے کا ٹاسک مقامی قیادت کو سونپ دیا ہے ، راولپنڈی سے الیکشن کمیشن دفتر تک پہنچنے کیلئے مسلم لیگ (ن) کی نائب صد رمریم نواز کا روٹ بھی طے کر لیا گیا ہے ،مریم نواز ریلی کی

قیادت شمس آباد کے قریب نواز شریف پارک سے کریں گی ،ریلی راول چوک سے ہوتی ہوئی شاہراہ دستور پر پہنچنے گی، سرینا ہوٹل پر پی ڈی ایم کی قائدین ریلیاں بھی مل جائیں گی ،سرینا ہوٹل سے تمام رہنما بڑی ریلی کی صورت میں الیکشن کمیشن کے باہر جائیں گے،مسلم لیگ (ن) نے احتجاجی مظاہرے میں لاکھوں افراد لانے کا ٹاسک مقامی قائدین کو سونپ دیا ہے جبکہ اٹھارہ جنوری کو ہونے والے پی ڈی ایم کی سٹیئرنگ کمیٹی میں تمام معاملات اور انتظامات کو حتمی شکل دی جائے گی ۔دوسری جانب وزیراعلیٰ پنجاب کی معاون خصوصی برائے اطلاعات و نشریات فردوس عاشق اعوان نے کہا ہے کہ استعفوں اور لانگ مارچ کی فلاپ فلم پر پی ڈی ایم میں صف ماتم بچھی ہے، راجکماری، شہزادے اور مولانا میں جلد جوتیوں میں دال بٹے گی۔ان خیالات کا اظہار انہوں نے لاہور میں میڈیاسے گفتگو کر تے ہو ئے کیا ۔ ڈاکٹر فردوس عاشق اعوان نے اپوزیشن جماعتوں پر تنقید کرتے ہوئے کہا پاکستان ڈیموکریٹک موومنٹ میں اب ہر کوئی

اپنی ہانک رہا ہے راجکماری، شہزادے اور مولانا میں پھوٹ پڑچکی ہے اور راجکماری، شہزادے اور مولانا میں جلد جوتیوں میں دال بٹے گی منافقین کا ٹولہ استعفے کبھی نہیں دے گا، چور اور لٹیرے لانگ مارچ نہیں کرسکتے۔انہوں نے مزید کہاکہ پی ڈی ایم والوں کا تو اپنا لونگ گواچ چکا ہے۔

یہ لوگ ضمنی الیکشن بھی لڑیں گے اور سینیٹ الیکشن میں بھی حصہ لیں گے عوام سیاسی مسخروں کی قلابازیوں پر لوٹ پوٹ ہورہے ہیں، پی ڈی ایم عناصر کو شرم سے ڈوب مرجانا چاہیے، کرونا پر منفی اور انتشار کی سیاست کا دھڑن تختہ ہوچکا ہے۔