ابوظہبی (این این آئی)متحدہ عرب امارات(یو اے ای)کی جانب سے رواں برس اگست میں اسرائیل کو تسلیم کیے جانے کے بعد دونوں ممالک میں جہاں ویزا فری معاہدے ہوئے، وہیں دونوں ممالک کے اداروں کے درمیان بھی کئی طرح کے معاہدے ہوئے۔اسی طرح دونوں ممالک میں تعلقات
بحال ہونے کے بعد دونوں ممالک میں ایک دوسرے کی چیزوں کی مانگ بھی بڑھ گئی۔ایسی ہی چیزوں میں متحدہ عرب امارات کی ریاستوں ابو ظہبی اور دبئی کے نام سے اسرائیل میں بنائے جانے والے ڈونٹس بھی شامل ہیں۔میڈیارپورٹس کے مطابق قابض اسرائیل کے شہر یروشلم کی ایک بیکری کی جانب سے یہودیوں کے مقدس تہوار حنوکاہ یا خنوکاہ کے موقع پر بنائے گئے خصوصی ابو ظہبی و دبئی ڈونٹس کی فروخت میں حیران کن اضافہ دیکھا گیا۔یہودی ہر سال کے آخر میں 8 روز تک خنوکاہ یا حنوکاہ کا تہوار مناتے ہیں، اس تہوار کو روشنیوں، خوشیوں اور جیت کا تہوار بھی کہا جاتا ہے۔اس تہوار کے موقع پر یہودی خصوصی طور پر میٹھی چیزیں تیار کرتے، کھاتے اور ایک دوسرے کے ساتھ ایسی چیزوں کا تبادلہ کرتے دکھائی دیتے ہیں۔ہر سال حنوکاہ یا خنوکاہ کے موقع پر سویٹس شاپس کی فروخت بڑھ جاتی ہے، تاہم اس بار یروشلم کی ایک بیکری کی جانب سے ابو ظہبی ودبئی کے نام سے تیار کیے گئے ڈونٹس کافی مقبول رہے اور انہیں حاصل کرنے کے لیے لوگوں کی لمبی قطاریں دکھائی دیں۔دکانداروں نے اعتراف کیا کہ انہیں یہ توقع نہیں تھی کہ اتنی مقدار میںابو ظہبی و دبئی ڈونٹس فروخت ہوں گے، تاہم سب سے زیادہ ابو ظہبی ڈونٹس کی مانگ رہی۔
