اسلام آباد (مانیٹرنگ ڈیسک/آئن لائن )پاکستا ن ڈیمو کریٹ موومنٹ تیزی کیساتھ فائنل رائونڈ کی طرف بڑھنے لگی ۔ تمام پارٹیز اراکین اسمبلی کو 31دسمبر تک استعفے جمع کرانے کے احکامات جاری کر دیے ہیں ۔ ذرائع نے بتایا ہے کہ مسلم لیگ( ن )کے بعد جے یو آئے (ف ) رہنمائوں نے اپنے استعفے جمع کرادیے ہیں ۔ جے یو آئی ف کے ارکان اسمبلی و سینٹ نے
مولانا فضل الرحمان کواپنے استعفے جمع کرا دیے ہیں ۔ دوسری جانب پاکستان ڈیمو کریٹ موومنٹ کا اجلاس ختم ہو کا ہے ، اجلاس میںنواز شریف نے ارکان اسمبلی کا ہدایات کی تھیں کہ وہ اپنے استعفے مولانا کے پاس جمع کروا دیں ۔ تاہم اس حوالے سے نجی ٹی وی پروگرام میں گفتگو کرتے ہوئے سینئر رہنما جاوید لطیف نے دعویٰ کیا ہے کہ ان کی اطلاعات کے مطابق ابھی تک 36ارکان اسمبلی نے اپنے استعفے پیش کر دیے ہیں ۔ ان کا کہنا تھا کہ پارٹی رہنما اپنی قیادت کیساتھ کھڑی ہے جیسے ہی حتمی فیصلہ ہو گا تما ارکان اسمبلی اپنے استعفے پارلیمنٹ میں جمع کروا دیںگے ۔دریں اثنا مسلم لیگ ( ن) کے ارکان اسمبلی نے اپنے استعفے پارٹی قیادت کو بھجوانے شروع کر دیئے ۔ پارٹی ذرائع کے مطابق پارٹی نے تا حال باضابطہ طور پر استعفے طلب نہیں کیئے تاہم پارٹی کی پالیسی کو مدنظر رکھتے ہوئے اور پارٹی سے وفاداری نبھانے والے چند اراکین اسمبلی نے اجتماعی استعفوں سے قبل ہی انفرادی طورپر اپنے استعفے پارٹی قیادت کو بھجوا نے شروع کر دیئے ہیں۔ پارٹی قیادت کو استعفے بھجوانے والوں میں لاہور سے رکن اسمبلی افضل کھوکھر ، سیف اللہ کھوکھر ،سرگودھا سے حامد حمید ،رانا منور غوث اور بصیر پور سے افتخار چھچھر نے اپنے استعفے پارٹی قیادت کو جمع کرا دیئے ہیں ۔پارٹی ترجمان عظمیٰ بخاری کا کہناہے کہ پارٹی کی جانب سے استعفے طلب نہیں کیئے گئے لیکن چند اراکین اسمبلی نے پارٹی پالیسی کو مدنظر رکھتے ہوئے استعفے جمع کرائے ہیں جن کی ہم قدر کرتے ہیں ۔
