اسلام آباد (این این آئی) وفاقی حکومت نے بیرون ملک 4 نئے معاشی وزیر تعینات کرنے کا فیصلہ کیا ہے جس کا مقصد غیرملکی سرمایہ کاری پاکستان لانا ہے۔ نجی ٹی وی نے ذرائع کے حوالے سے بتایاکہ معاشی وزیر لندن، واشنگٹن، بیجنگ اور ٹوکیو

میں تعینات کیے جائیں گے، معاشی وزرا کی تعیناتی کے لیے سینئر بیوروکریٹس کے انتخاب کا فیصلہ کیا گیا ہے، مختلف عہدوں پر تعینات گریڈ 20 اور 21 کے موزوں امیدواروں کی نامزدگیاں فوری طلب کرلی گئی ہیں۔ذرائع کے مطابق وفاقی وزارتوں، ڈویڑنز اور صوبائی حکومتوں سے ماہر افسروں کے نام مانگ لیے گئے ہیں، آزاد کشمیر، گلگت بلتستان حکومتوں سے بھی موزوں افسران کے نام مانگ لیے گئے ہیں۔ذرائع ے مطابق وفاقی حکومت نے مراسلہ بھیجا ہے جس میں کہا گیا ہے کہ موزوں امیدواروں کی نامزدگیاں 30 نومبر تک فراہم کی جائیں۔ذرائع کے مطابق امیدواروں کا انتخاب مسابقتی عمل سے ہوگا، آئی بی اے کراچی تحریری ٹیسٹ لے گا، تحریری امتحان میں کامیاب امیدواروں کاوفاقی حکومت کی کمیٹی انٹرویو کریگی۔