کراچی (نیوزڈیسک) پاکستان تحریک انصاف کے چیئرمین عمران خان نے کہا ہے کہ زرداری فوج کے خلاف بیان دے کر پھنس چکے ہیں اور وہ خوف کی وجہ سے دبئی فرار ہوچکے ہیں۔ نواز شریف نے پہلے زرداری کو آگے کیا، اب وہ خود سائیڈ لائن ہوگئے ہیں۔ 2013ءکے انتخابات شفاف نہیں تھے۔ بدترین دھاندلی کی گئی۔ جوڈیشل کمیشن انتخابی دھاندلی کے حوالے سے جو بھی فیصلہ دے گا ہم قبول کریں گے۔ وہ اتوار کو کراچی ایئرپورٹ پر میڈیا سے بات چیت کررہے تھے۔ انہوں نے کہا کہ اڑھائی کروڑ ووٹوں کا ریکارڈ نہیں ملا ہے۔ 35 پنکچر والی بات مرتضیٰ پویا نے کی تھی۔ وہ آج بھی اپنی بات پر قائم ہیں۔ہمارے وکیل نے جوڈیشل کمیشن کو بتایا کہ الیکشن 2013ءمیں 35 نہیں بلکہ 71 پنکچر لگائے گئے۔ انہوں نے کہا کہ ملکی تاریخ میں پہلی مرتبہ الیکشن میں ہونے والی دھاندلی کی تحقیقات ہورہی ہے۔ جوڈیشل کمیشن کا فیصلہ حیران کن ہوگا۔ ہم پرامید ہیں کہ جوڈیشل کمیشن کا فیصلہ ہمارے حق میں آئے گا۔ انہوں نے کہا کہ ہم اپنی بات پر اب بھی قائم ہیں کہ پنجاب میں آر اوز کے ذریعے دھاندلی کی گئی۔ دودھ کا دودھ اور پانی کا پانی ہونے والا ہے۔ انہوں نے کہا کہ سندھ میں کرپشن کا ریکارڈ توڑ دیئے گئے ہیں۔ چاروں طرف افراتفری مچی ہوئی ہے۔ انہوں نے کہا کہ کنپٹی پر بندوق رکھ کر جو پیسہ لیا جاتا ہے، اسے فنڈ ریزنگ نہیں بلکہ بھتہ خوری کہتے ہیں۔ کراچی میں بھتہ خوری کا خاتمہ ہونا چاہئے اور سندھ میں کرپشن کرنےو الوں کا سخت احتساب ہونا چاہئے۔ انہوں نے کہا کہ را کے سابق سربراہ نے اپنے انٹرویو میں اس بات کی تردید نہیں کی ہے ”را“ ایم کیو ایم کو فنڈ نہیں دیتی تھی۔ انہوں نے کہا کہ ان کا انٹرویو گول مول ہے۔ انہوں نے کہا کہ ایم کیو ایم میرے خلاف تو عدالت میں جاتی ہے بی بی سی کے خلاف کیوں عدالت میں نہیں گئی۔ ؟ عمران خان نے کہا کہ آصف علی زرداری فوج کے خلاف بیان دے کر پھنس گئے ہیں۔ اس لئے وہ دبئی بھاگ گئے ہیں۔ انہوں نے کہا کہ ہماری محنت کے ثمرات ظاہر ہونے والے ہیں۔ ہمیں 100فیصد یقین ہے کہ نیا پاکستان بن کر رہے گا۔ انہوں نے کہا کہ میں کراچی میں شوکت خانم اسپتال کی فنڈ ریزنگ کے لئے آیا ہوں۔ کراچی میں بھی کینسر اسپتال کے لئے زمین خرید لی گئی ہے۔ جلد کام کا آغاز کردیا جائے گا۔