اسلام آباد(مانیٹرنگ ڈیسک) پشاور کے علاقے دیر کالونی میں کوہاٹ روڈ پر واقع مدرسے میں دھماکہ، 7 افراد شہید اور 74 زخمی ہو گئے۔نجی ٹی وی کے مطابق دھماکے کے وقت مدرسے میں تدریسی عمل جاری تھا، دھماکے کے نتیجے میں شہید و زخمی ہونے والوں میں بڑی تعداد
بچوں کی ہے۔پولیس، سیکیورٹی فورسز اور ریسکیو ٹیمیں دھماکے کے مقام پر پہنچ چکی ہیں جو امدادی کاموں میں مصروف ہیں۔ریسکیو 1122 کے حکام کے مطابق زخمی ہونے والے متعدد بچوں کی حالت تشویش ناک ہے۔لیڈی ریڈنگ ہسپتال کے حکام کے مطابق ہسپتال میں 5 لاشیں لائی گئی ہیں، جاں بحق ہونے والے افراد کی عمریں 20 سے 30 سال کے درمیان ہیں۔لیڈی ریڈنگ ہسپتال پشاور کے حکام نے 70 زخمیوں کو ہسپتال منتقل کرنے کی بھی تصدیق کی ہے جن میں سے 40 بچے ہیں۔2 زخمی خیبرٹیچنگ ہسپتال اور 2 حیات آباد میڈیکل کمپلیکس منتقل کیے گئے ہیں۔لیڈی ریڈنگ ہسپتال پشاور کے ترجمان کے مطابق شہید افراد میں کوئی بچہ شامل نہیں ہے، 5 زخمیوں کی حالت تشویش ناک ہے، شہید افرادکی عمریں 30 سال سے زائد ہیں۔پشاور پولیس کے مطابق دھماکا ٹائم بم کے ذریعے کیا گیا جبکہ دھماکا خیز مواد بیگ میں رکھ کر مدرسے لایا گیا تھا۔عینی شاہد کے مطابق مدرسے میں دوسرا پیریڈ شروع ہونے والا تھا کہ اچانک دھماکا ہوا، دھماکے کے وقت 1 ہزار سے 12 سو افراد مدرسے میں موجود تھے۔
