لاہور( این این آئی )پاکستان مسلم لیگ (ن) کے سیکرٹری جنرل احسن اقبال نے کہا ہے کہ جس نے بھی تین مارشلائوں کے بعد چوتھے مارشل لا ء کا سوچا تو وہ ملک کا دشمن ہوگا، بچا کچا پاکستان چوتھے مارشل لا ء کا متحمل نہیں ہو سکتا،
جب اپوزیشن استعفے دے گی وزیر اعظم نہیں بلکہ الیکشن کمیشن انتخابات کروائے گی۔ میڈیا سے گفتگو کرتے ہوئے احسن اقبال نے کہا کہ حکومت اپوزیشن کے استعفوںپر صرف بڑھک لگا رہی ہے ، اگر اپوزیشن نے استعفے دیئے تو وزیر اعظم کا بھی نیا الیکشن ہوگا۔ انہوں نے کہا کہ محمد زبیر کی آرمی چیف سے ملاقات ذاتی تھی،(ن) لیگ نے ہدایات جاری کردی ہیں کہ اب کوئی قیادت کو بتائے بغیر عسکری قیادت سے ملاقات نہیں کرے گا ۔ انہوں نے کہا کہ لوٹوں کو قبول کرنا عوام کے سیاسی شعور کی توہین ہے، پاکستان کے استحکام اورمضبوطی کا ایک ہی راستہ ہے وہ آئین کا راستہ ہے، پاکستان کو جمہوریت اور قائد اعظم کے راستے پر چلانے سے ہی ترقی کر سکتاہے۔ احسن اقبال نے کہا کہ اے پی سی میں فیصلہ نہیں ہوا لیکن ہر الیکشن میں وفاداریاں تبدیل کرنے والوں کو پارٹی میں نہ لیاجائے،الیکشن کے سیاسی موسمی پرندوں کی حوصلہ شکنی کرنی ہوگی۔
