اسلام آباد (مانیٹرنگ ڈیسک) لاہور سیالکوٹ موٹر وے کیس پر ترکی کی معروف اداکارہ اسرا بیلجیک نے بھی اپنے شدید ردعمل کا اظہار کیا ہے اور سی سی پی او لاہور کو کو ہدف تنقید بنایا ہے۔ لاہور سیالکوٹ موٹر وے کیس دنیا بھر میں زیر بحث ہے
اور سی سی پی او کے بیان نے تو جلتی پر تیل کا کام کیا ہے۔ حلیمہ سلطان کا کردار ادا کرنے والی اداکارہ اسرا بیلجیک نے سی سی پی او لاہور عمر شیخ کے بیان کو شرمناک قرار دیا اور کہا کہ اس طرح کے بیان پر انہیں شرم آنی چاہیے۔ ترک اداکارہ نے عمر شیخ کے بیان کی ویڈیو انسٹاگرام پر شیئر کی اور لکھا کہ ایک خاتون اکیلے سفر کر سکتی ہے یا پھر اپنے بچوں کے ساتھ مگر ان کا تحفظ اور ان کی سیکیورٹی یقینی بنانا پولیس کا کام ہے۔ ترک اداکارہ نے مزید لکھا کہ اگر بے آبرو کرنے والے سڑکوں پر دندناتے پھریں تو ان سے آپ کو کوئی مسئلہ نہیں مگر آپ کے خیال میں اگر کوئی خاتون سڑک پر نکل آئے تو اسے بے آبرو کر دینا جائز ہے؟ ترک اداکارہ نے سی سی پی لاہور کے بیان کو جہالت قرار دیا اور لکھا کہ ان کی طرح سوچنے والے لوگ کس طرح معاشرے کے لیے شرمندگی کا باعث بنتے ہیں۔
