لاہور(مانیٹرنگ ڈیسک+ این این آئی) نامور اداکارہ صوفیہ احمد نے کہا ہے کہ کمسن بچوں اور خواتین سے بڑھتے ہوئے شرمناک واقعات انتہائی تشویش کا باعث ہیں ، صوبائی دارالحکومت لاہور میں مسافر خاتون کی اس کے بچوں کے سامنے عصمت دری کا واقعہ اس امر کا متقاضی ہے
کہ حکومت کو درندوں کے خلاف ایسی قانون سازی کرنا ہوگی جس میں انہیں سر عام چوراہے پر پھانسی پر لٹکایا جا سکے ۔اپنے ایک بیان میں صوفیہ احمد نے کہا کہ والدین اپنے کمسن بچوںکے حوالے سے شدیدخوف میں مبتلاہیں لیکن حکومت کو اس کی ذرا بھی پرواہ نہیں، قانون کی حکمرانی نہ ہونے کا نتیجہ ہے کہ درندوںنے خاتون کو سڑک پر بچوں کے سامنے شرمناک عمل کا نشانہ بناڈالا اور حیرت کی بات ہے کہ اس پر حکومت کے کانوں پرجوںتک نہیں رینگی ۔ا نہوںنے کہاکہ میں ہمیشہ سے کمسن بچوں اورخواتین پران شرمناک واقعات کیخلاف آواز بلندکرتی آئی ہوںاور اسی کانتیجہ ہے کہ آج مجھے اپنا ملک چھوڑکر امریکہ منتقل ہونا پڑا۔ مطالبہ ہے کہ خاتون کی عزت کو تار تار کرنے والوں کو سزائے موت دے کر انہیں سر عام چوراہے پر لٹکایاجائے۔اس واقعہ کے حوالے سے اداکار فیروز خان نے اپنے ٹوئٹ میں کہا کہ آپ ریاست مدینہ کے دعویدار ہیں اگر آپ نے خاتون کے ساتھ شرمناک سلوک کے ملزمان کو کیفر کردار تک نہ پہنچایا تو میں سمجھوں گا کہ کوئی تبدیلی نہیں آئی، اداکارہ اشنا شاہ نے بھی اپنے ٹوئٹر پیغام میں کہا کہ مروہ کی خبر کے دو دن بعد ہی موٹر وے سانحہ سامنے آیا ہے، ہم بطور معاشرہ کتنی مشکل میں ہیں۔ اداکارہ ارمینا نے بھی اس واقعے کے بعد اپنے آپ کو غیر محفوظ کہا ہے۔