نیویارک (این این آئی)ہولی وڈ کی آنے والی ایکشن فلم’مشن امپوسبل 7 شوٹنگ کے مراحل میں ہے تاہم مذکورہ فلم کے حوالے سے خبر سامنے آئی ہے کہ اس کے ایک سین کو شوٹ کرنے کے دوران ناکامی پر فلم ساز کو 44 کروڑ روپے سے زائد کا نقصان ہوا۔مشن امپوسبل7 کی شوٹنگ حال ہی میں برطانیہ میں اس وقت شروع کی گئی تھی جب وہاں پر کورونا کیسز میں کمی دیکھی گئی تھی اور فلم کی ٹیم گزشتہ ڈیڑھ ماہ سے

ایک سین کی شوٹنگ کیلئے سیٹ تیار کرنے میں مصروف تھی۔برطانوی میڈیا کے مطابق ‘مشن امپوسبل 7 کا ایک مہنگا اور خطرناک ترین سین ریاست انگلینڈ کے علاقے آکسفورڈشائر کے جنگلات میں شوٹ کیا جانا تھا، جس کیلئے فلم کی ٹیم نے 6 ہفتوں کی مسلسل محنت اور کروڑوں روپے کے اخراجات سے سیٹ تیار کیا تھا۔رپورٹ میں بتایا گیا کہ مذکورہ سین کے لیے جنگلات میں مہنگے سامان سے ایک پل تیار کیا گیا اور وہاں پر ہیلی کاپٹر کے ذریعے موٹر سائیکلوں کو پہنچایا گیا تھا تاہم جب فلم کی ٹیم نے مذکورہ سین کو منصوبے کے تحت شوٹ کرنا شروع کیا تو شوٹنگ کے عین درمیان اچانک موٹر سائیکل کے ٹائروں میں آگ لگ لگ گئی اور پورا سیٹ خراب ہوگیا۔رپورٹ میں بتایا گیا کہ موٹر سائیکل پر اسٹنٹ کرنے والے اسٹنٹ مین کو بڑی مہارت سے زخمی ہونے سے بچا لیا گیا اور جیسے ہی موٹر سائیکل میں آگ لگی تو اسٹنٹ مین کو رسیوں کی مدد سے اٹھالیا گیا اور موٹر سائیکل سیٹ سے کچھ فاصلے پر جاکر گری۔مذکورہ سین کیلئے جہاں فلم کی ٹیم نے کئی ہفتوں تک محنت کی،وہیں موٹر سائیکل کی خریداری، اسے مذکورہ جگہ پر پہنچانے، اسٹنٹ مین کی فیس اور سین کیلئے بنائے گئے سیٹ کی تیاری پر کم از کم 20 لاکھ پاؤنڈ خرچ ہوئے تھے۔مذکورہ سین کے لیے 26 لاکھ امریکی ڈالر سے زائد کا خرچہ آیا جو کہ پاکستانی 44 کروڑ روپے سے زائد بنتے ہیں۔مذکورہ سین کی ناکام شوٹنگ کے بعد فلم کی شوٹنگ ایک بار پھر منسوخ کردی گئی اور اب خیال کیا جا رہا ہے کہ آئندہ چند ماہ بعد دوبارہ مذکورہ سین کو شوٹ کرنے کی کوشش کی جائے گی۔